Тодоо энэ удаад үнэхээр тодоор дүрээ гаргалаа. Энэ цагийн зэвүүн, шилээвэр гэсэн жүжигчдийг “түүж” кинондоо тоглуулдаг “Фантастик” продакшны уран бүтээлчид, Б.Тамир найруулагч түүүнийг урьсан нь үнэхээр оносон сонголт байлаа. Тэр ч Авлигатай тэмцэх газрын ахлах комиссор Сэргэлэнгийн дүрийг бүтээсэн шиг бүтээж чадлаа. 

          Ажлаа үнэнч шударга хийх хүсэл хүн бүрд байдаг ч хөрөнгө мөнгө, эрх мэдэлтэй хүмүүсийн нөлөөгөөр өөрчлөгдөж, эсвэл тэдний үгээр байх, аялдан дагах, үгүй бол ажилгүй болж, бие, сэтгэлээрээ хохирох гэсэн сонголтод тулдаг. Үүний нэгэн төлөөлөл дүр Сэргэлэн байв. Тэгэхдээ эцсээ хүртэл өөрийн үзэл бодолдоо үнэнч, мөн чанартаа эзэн байж, харин бусдад үйлчилж, хүслийг нь биелүүлж байгаа мэт болж эцэстээ тэднийг нураан унагааж чадсан.

      Заримдаа нээрээ өөрийн зарчмаа авч үлдэхийн тулд өрөөлийн талд байгаа мэт байж л энэ бохир, хүн чанаргүй нийгмээс хүнээрээ үлдэж чадах мэт. Энэ мэтээр түүний дүр олон зүйл бодогдуулж байв. Инээж байгаад л ар нуруу руу нь хутга зоодог хүмүүсийн дунд ч мөн инээж байгаад л нуруугаа хамгаалах ёстойг, тэдний буруу булхайг илчлэх ёстойг харууллаа. Түүний энэ дүр мандаж, унаж, буцаад хэн нэгний зориг дэмээр босож, дахин босохдоо бүр ч ухаалаг, болгоомжтой, сэргэлэн хөдөллөө. Үүнд нь түүнд том баяр хүргэе.

     Урьд бид түүнийг “Бид гурвын болзоо”, “Намайг хайрла”, “Нүдээ аниад төсөөл”, “Яллагч”, “Хийморь”, “Сүнс”, “Цагаан эрэг”, “Ээж” зэрэг киноны дүрээр нь мэдэх билээ. Ингээд харахаар тэр дандаа өөр, өөрийн өнгө аястай дүрийг бүтээсэн мэт. Гэсэн ч төдийлөн ялгаран товойж, “Энэ дүр нь зэвүүн болжээ” гэх нь төдийлөн ховор.

           Харин энэ удаагийн дүр нь онцгой сэтгэгдэл төрүүлж, түүний тухай бичих үүдэл болсон юм. Багаасаа л урлагт дуртай, дуу, хөгжим эгшиглэсэн хаана ч дагаж дуулаад, бүжиглэчихдэг хөдөлгөөнтэй, сэргэлэн цовоо хүүхэд байжээ. Тийм нэг зоргоор, өөрийнхөөрөө, чөлөөтэй араншин нь ч зарим бүтээлийн дүр болоод телевизийн нэвтрүүлэгт ярьж буйгаас нь анзаарагддаг.

         Тэр “Би Монголын хүүхдийн ордны дугуйланд явдаг байсан. Ордны драмын ангийнхан инээдмийн баяраар “Өлгийтэй инээд” гэх тайлан тоглолтыг тавьсныг үзээд маргааш нь ангиа драмын ангиар сольж байсан. Магадгүй тэр тоглолтыг үзээгүй бол би жүжигчин мэргэжлийг сонгоогүй  байх ч байж мэдэх юм" гэсэн байдаг. Тэндээс л урлагийн хүн, тэр дундаа жүжигчин болох хүсэл мөрөөдлийн жигүүр ургаж, "Сити" их сургуульд орж, найруулагч Ц.Батнайрамдал багшийнхаа удирдлагад суралцан төгссөн байна. Сургуулиа төгсөөд жилийн дараа  Улсын драмын эрдмийн театр гэх айлд уран бүтээлч ах, эгч нараасаа суралцан дагалдан жүжигчнээр ажиллаж эхэлжээ.

         Театр угаас уран бүтээлчийг төлөвшүүлж, боловсруулж, бүтээдэг гэдэг. Тэр ч театраас чамгүйг суралцаж, урлагт өөрийн өнгө төрх, арга барилыг барьж яваа уран бүтээлч. Гаднаа тэр хөнгөн, хөгжилтэй мэт боловч тайз, дэлгэцнээ аль нэг найруулагч дүр онооход итгэлийг нь даасан шиг дааж, авсан дүрийнхээ ард нь ёстой гарсан шиг гарч, дүрийнхээ мөн чанарыг уудалсан шиг уудлан дэлгэдэг чансаатай уран бүтээлч юм.

Ийм ховорхон чанар түүнд нэвт шингээстэй байдаг нь бүтээл бүрээр нь илэрдэг. Үзэгчид ч гарцаагүй итгэж, үнэмшиж, автдаг.

-МАМБРЕТТО, МЕРКУЦИО...-

    Тайзнаас тэр чин шударга, үнэнч дайчин, эрэлхэг зоригтой, иртэй, хурдтай Меркуциогоор анх үзэгчидтэй уулзаж байсан. Яагаа вэ, Английн алдарт зохиолч, яруу найрагч Уильям Шекспирийн “Ромео Жульетта” жүжгийн. Театрын студи ангийн дагалдан жүжигчний хувьд том ч дүр, алтан ч боломж байсан нь мэдээж. “Тунгалаг тамир” киноны Итгэлт баяны дүрийг бүтээсэн алдарт жүжигчин А.Очирбат гуай, Гавьяат жүжигчин Н.Онон, Ш.Доржсүрэн гэх эрхмүүд тоглож байсан Меркуцио шүү дээ. Тодоо харин дутахгүй тоглож, дүүрэн гүйцээж театрт үндсэн жүжигчнээр тэнцэж байсан нь одоогоос арав гаруй жилийн өмнө.

               "Надад ямар дүр өгөх бол", ямар ч дүр өгсөн “бүх чадлаа дайчилж ажиллана даа” гэх ассан бодолтой, уран бүтээлийн төлөө шатан дүрэлзсэн галтай үед нь түүнд хамгийн хариуцлагатай мөртлөө өөрийгөө бүрэн дүүрэн харуулах ийм нэг дүр өгсөн нь түүнийг урлагийн тавцанд цаашид ирээдүйтэй гэдгийг тодоор харуулж чадсан. 

      Тэр өөрөө ч “Би бүтээсэн бүх дүрдээ хайртай ч Меркуциогийн дүрдээ илүү хайртай. Театрын алтан тайзны хүн болох тасалбар минь шүү дээ” гэсэн байдаг. Үнэхээр ч тэр  тасалбараараа театрт 2019 он хүртэл зорчиж, монгол болон дэлхийн олон сонгодог жүжигт гол болон туслах дүр бүтээсэн. Мөн театраас олж, түүнийг үзэгчдэд хүргэх нэгэн гүүр бол “Драм 3” хамтлаг. “Макарина” дууг нь бид андахгүй дээ. Ингэж театраас урган гарч, авьяас билгээрээ далавчлан ниссэн нэгэн тэр юм.

          Театраас гарснаас хойш ч тэр тайз, дэлгэцээ хослуулан олон бүтээлд тоглосон. Жүжигчин Х.Цасчихэртэй хамтран “Reaction” продакшн байгуулж, кино ч хийсэн. Ганц дүрээ гаргахаас ангид өөрсдийн ухаан, бодол, сэтгэл шингэсэн бүтээлийг үзэгчдэд хүргэсэн нь тэднийг илүү тодоор, томоор харах боломжийг үзэгчдэд олгосон болов уу. Түүнээс гадна Тодоогийн тоглосон  "Чөлөөт хос" жүжгийг мөн онцлохгүй өнгөрч боломгүй байх. Урлагийн гавьяат зүтгэлтэн Ч.Найдандорж найруулагчийн энэ жүжигт тэр театрын студи ангийн жүжигчин байхдаа тоглож байсан юм билээ. Ур чадвар, авьяас билиг шаардсан тийм нэг дүрээс эхэлсэн гэдэг нь өөрөө цаашдын олон бүтээлд том босгыг тавьдаг болов уу.

Тэр дүрдээ гүйцэтгэл сайтай ажилладаг чулуу шиг зангаараа олон ч дүрийг бүтээнэ байх аа.