Хэрвээ танд цай хөрөх мөчидхөн хугацаанд өнгөрсөн рүү аялж, хэн нэгэнтэй уулзах боломж гарвал хэнтэй уулзах вэ.  Хүн бүрийн дотор нууцхан байдаг тэр хүсэл “Эргэх учрал” кинонд биеллээ олно.

          Киноны турш надад “Хэрвээ надад ийм боломж байсан бол эмээгийнхээ энгэрт цай хөртөл, ганцхан удаа тэврүүлэх юм сан” гэх бодол эргэлдэж байв. Эмээгийнхээ царайг бүдэг бадагхаан санаж, бусдын үгнээс л сонсож ирсэн болохоор өнгөрсөн очиж уулзах юм сан гэх биелэхгүй нэг хүсэл надад бий.

      Би эмээдээ “Зээ нь хүссэн замаараа гэлдэрч л яваа шүү.  Таны бага охин/миний ээж/ ач нараа тойруулсан тань шиг дүүрэн сэтгэлтэй эмээ болсон” гэж хэлмээр байна.

 Киноны тухай цухас тэмдэглэвэл,

        Киноны ихэнх үйл явдал нэгэн буйдхан хэр нь  хачирхалтай кафед өрнөнө. Тэнд өөр өөрийн зовлонтой хөхөө дуугарахыг чин сэтгэлээсээ хүссэн хүмүүсээр “дүүрэн. Учир нь хөхөө дуугарахад тэд шидэт сандал дээр сууж өнгөрсөн рүү аялдаг юм.

          Хайртай хүнээ, ээжийгээ, дүүгээ санасан хүмүүс ээлжлэн ирнэ. Тэднийг “Ганцхан удаа л харах юм сан, тэгээд л хэлчихвэл боллоо” гэх ганцхан хүсэл нэгтгэж, энэ кафены зүг хөтөлдөг. Хагацал, эргээд уулзах хүсэл л хүнийг тэгтэл шантрааж, бачууруулж, боломжгүйд итгэхэд хүргэдэг байх.

       Зохиолч Г.Анхбаяр уг бүтээлээрээ дамжуулан бидний сэтгэлийн “утас”-ыг  хөндөж, өнгөрснөө эргэцүүлэх, хэн нэгнийг үгүйлэх мэдрэмжийг өглөө. Харин найруулагч Х.Манлайбаатар ч л дүрүүдээ маш сайн сонгожээ. Дүрүүдэд МУГЖ С.Лхагвасүрэн, МУСТА Д.Батцэцэг, Б.Гарамханд, Н.Цэнд-Аюуш болон залуу жүжигчин Г.Золзаяа, Ц.Номин, Т.Анхзул, О.Уярал, Х.Сумьяадорж нар тогложээ.

           Жүжигчдийн намуухан яриа, үнэн жүжиглэлт, киноны өнгө, дуу үнэхээр мэдрэмжтэй байлаа.  Дүрүүдээс Т.Анхзулын дүр хамгийн гэгээн хийгээд нандин дүр байв.  Хэрэв би түүний оронд байсан бол “Эгчээ би танд гомдож байна...” гээд уурлаж, хашхирч, уйлах байлаа. Гэтэл тэр тэгсэнгүй эгчдээ хэчнээн гомдсон ч үргэлж хайрласаар, зөөлөн хандсаар байв. Хорвоогоос буцахдаа ч эгчдээ ухаарал өгөөд буцаж байгаа нь хайр хүрмээр, бас бачуурмаар... 

                Хэрвээ эгч нь ганцхан удаа дүүтэйгээ уулзсан бол. Түүнээс зугтааж, нуугдаагүй бол тэдний гэр бүл уй гашууд автахгүй байлаа.  Бид яг одоо л хайрлаж, уучилж чадвал өнгөрсөн цаг хугацаанд бид юунд ч харамсахгүй гэдгийг ч түүний дүр харуулж байв.

                Уншигч та бүхэн амралтын өдрөөр “Эргэх учрал” киног гэр бүлээрээ үзэж, нэгийг бодоод үзээрэй.