"Монголын шилдэг нийтлэл" эрдэм шинжилгээ, судалгааны төв ТББ-аас эрхлэн гаргадаг "Монголын шилдэг нийтлэл" цуврал 99 ботийн 55 дугаар боть, сэтгүүлч, нийтлэлч, яруу найрагч Д.Дамдинжавын сэтгүүл зүйн бүтээлээр хэвлэгдэн гарлаа. Монголын шилдэг нийтлэлийн түүвэрт сэтгүүлч Д.Дамдинжавын  "Улстөрийн шогийг ухаан санаа зарж, ур чадвар зааж бичдэг юм", "Хэтэрхий мэргэн жараахай", "Ханхай төрийн танхай хулигаан", "Дайн үзээгүй баатар", "Манай үеийн мангас", "Унасан ч давдаг бөх", "Үр зуусан бүргэд буюу экологийн эцэг", "Орхигдсон "тосгон", "Семинартай" зэрэг памфлет, хөрөг, нийтлэл, тэмдэглүүд нь багтсан байна. 

         Сэтгүүлч, нийтлэлч Д.Дамдинжав нь Дорнод аймгийн Гурванзагал суманд төрсөн бөгөөд Хүмүүнлэгийн ухааны их сургуулийг олон улсын сэтгүүлч мэргэжлээр төгссөн байна. Тэрбээр Монголын Зохиолчдын эвлэлийн гишүүн бөгөөд Монголын сэтгүүлчдийн нэгдсэн эвлэлийн "Ган үзэг", "Хэвлэл мэдээллийн тэргүүний ажилтан", 2018 оны сэтгүүл зүйн шилдэг бүтээлийн шагнал хүртсэн юм.

        "Бусдын сүм дэх миний эрх чөлөө" нийтлэл, тэмдэглэл, ярилцлага, яруу найргийн номоо анхлан 2006 онд хэвлүүлж байсан бөгөөд 2011 онд "Зүрхний хилэн" яруу найргийн номоо гаргасан байна. Харин 2018, 2019 онд "Гол тоглогч" I, II хөрөг, памфлетын номоо хэвлүүлсэн бол 2019 онд "Дотоод тэнгэр" яруу найргийн номоо гаргасан байна. Харин 2020 онд "Хожлын хорин бэрс" хөрөг нийтлэлийн номоо гаргасан юм.