“PRO” ТЕАТРЫН ИТГЭЛ

2024-06-02, 1914

"Pro" театрын үүсгэн байгуулагчдын нэг, найруулагч, жүжигчин О.Итгэлийг бид энэ удаагийн соёл урлагийн бичвэртээ онцолж байна. Тус театрын уран бүтээлчид “Щелкунчик” жүжгийг тавьж буй билээ. О.Итгэлийн хувьд энэ жилийн “Гэгээн муза” наадмаас “Инээмтгий хүн” жүжгийн туслах дүрээрээ шилдэг уран бүтээлчийн шагнал хүртсэн. Урьд бид түүнийг найруулагч, дэлгэцийн даруухан уран бүтээлчээр харж байсан бол “Инээмтгий хүн” жүжиг цоо шинэ Итгэлийг бидэн нээсэн. Түүнийг тайзны зэвүүн эсрэг дүрд ангийнх нь охин, найруулагч Б.Даваасүрэн “түлхэж”, тэр ч хайр дурлалынхаа эсрэг хүн өөрийн шуналаасаа болж хэрхэн хувирч, зогсож чаддагийг харуулсан. Тун зэвүүн туслах дүрийг тэр амттай мөртлөө адтайгаар үзэгчдэд хүргэж чадсан. Итгэлээс энэ хэрийн олон дүр, бүтээл гарах нөөц бололцоо дүүрэн бий. "Pro" театрынхан эхэлж байгаатай зэрэгцэн түүний уран бүтээлүүд ч мөн жигдэрч, үргэлжилж байн

Өөртөө олон туршлагыг хуримтлуулж, тасралтгүй суралцсан тэрбээр улам боловсорч яваа уран бүтээлч.

Тэрбээр 2008 онд СУИС-ийн жүжигчний ангид элсэн суралцаж байгаад, 2010 онд Монгол Улсын Засгийн газрын тэтгэлгээр ОХУ-ын Санкт Петербург хотод жүжигчин мэргэжлээрээ үргэлжлүүлэн сурч төгссөн.

Энэ тухай тэрбээр “Тухайн үед их өндөр шалгууртай байсан бөгөөд таван удаагийн шалгалт авч, сүүлийн хоёр шалгалтыг ОХУ-аас мэргэжилтнүүд ирж авч байсан. Нийт 100 гаруй хүүхэд шалгалт өгснөөс таван эрэгтэй, таван эмэгтэй хүүхэд л шалгаж авч байлаа. Тэр 10 хүүхдийн нэг болж ОХУ-ыг зорьж байсан. Анх улсын бодлогоор хүүхэлдэйн театрын жүжигчин бэлдэх зорилготой байсан юм билээ. Очсон байдал тэс өөр байсан. Бид хүүхэлдэйн театр, драм, тайз, дэлгэц гээд бүх төрлөөр бэлтгэгдсэн” гэнэ.

Ийн сургуулиа төгсөж ирсэн тэрбээр сурсан, мэдсэнээ бодитоор буулгаж, СУИС-д багшилж, кинонд тоглож, хошин урлагийн “Эмоци” продакшнд ч ажиллаж, юм юманд л өөрийгөө сорьж үзсэн юм билээ. Тэрбээр “Хошин урлаг гэдэг зүйлээс маш их зүйл сурсан. Өнөөдрийн тодорхой хэмжээний нэр хүндийг олохын тулд их хичээл зүтгэл, хөдөлмөр шаарддаг юм байна гэдгийг ах нараасаа сурсан. Түүний дараагаар 2015 онд би УДЭТ-т шалгалт өгч байсан. Тухайн үед нэг асуудлаас болж хамгийн сүүлийн монологоо уншиж чадаагүй. Тэр үед их харамсаж, гэмшиж байсан. Гэхдээ бүтэн жил кинонд туслахаар ажиллаж, туршлага хуримтлуулж байгаад 2016 онд шалгалтаа өгч, тэнцэж байлаа” гэсэн.

Дүрийн хувьд тэр “Хоймор өнжих нар” киноны Энхжингийн дүрд анх тоглосон байдаг бол олон уран бүтээлийн найруулагчаар ажилласны нэг нь “Seasons Of Love” кино. Хайр дурлалын дөрвөн түүхийг онцгойлон авч “Seasons Of Love” кино зохиолыг бичсэн, бүтээсэн гэдэг. Найруулагчийнхаа хувьд тэр их хариуцлагатай, өргөн цар хүрээнд боддог, мөн тухайн сэдэв, цаг үеэ их сайн мэдэрдэг найруулагч юм билээ. Тиймдээ ч “Хүн өөрийнхөө чадвар, нөөцийг зөв үнэлэх хэрэгтэй гэж боддог. Миний хувьд мэргэжлийнхээ хувьд У.Шекспирийн “Ромео, Жултьетта”-г тайзанд тавьж чадна даа гэж боддог бол Гамлет, Фаустыг тавихад “нас болоогүй” гэж мэдэрдэг. Залуу хүний хувьд хайр дурлалын сэдэв их ойр л доо. Харин амьдралын үнэ цэнэ, утга учир, үнэн худал, үхэл тэмцлийг мэдрэх нас маань арай болоогүй. Энэ нь өөрийгөө голж байгаа хэрэг биш мэдэрч байгаа хэрэг. Магадгүй би 40, 50 хүрч байж л Фаустыг ойлгоно. Тиймээс ч том дүрүүдийг бүтээхийн тулд амьдралыг туулж, ертөнцийг ойлгож, өөрийнхөө үзэл бодлыг төлөвшүүлэх хэрэгтэй. Цаг нь болоогүй чадахгүй зүйлээрээ оролдоно гэдэг тэнэглэл” гэж ярьсантай ч холбоотой байх. Ямартай ч түүнд олон талын чадвар авьяас байгааг бид харж, чамгүй бүтээлээс нь мэдрээд буй.

Өдгөө харин тэр “Pro” театрын ганхашгүй нэгэн итгэл болж, уран бүтээлээ хийж явна.

“PRO” ТЕАТРЫН ИТГЭЛ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2023-12-11 10:04:27

Үзз: Энэ нэг тийм гөлгөр муу санаатай нөхөр харагддаг юм зөв сэтгэлтэй хүн лав биш. олон охидоор тоголсон муу зальтай новш шд

Шинэ мэдээ