ГЭГЭЭН ИНЭЭМСЭГЛЭЛ

2023-12-30, 4209

Анхлан тэр бидэнтэй “Сарны нулимс” киноны Цоомоогийн дүрээр уулзаж байв. Тунгалаг хар нүд, зөөлөн дөлгөөхөн төрхтэй цэл залуухан Т.Хулан гэх уран бүтээлч тэр л үеэс гэгээхэн инээмсэглэл татуулсаар Монголын урлагийн хаалгыг цэлийтэл нээгээд орж ирсэн. Залуухан уран бүтээлч дүр бүхэнд л өөрийгөө сорих мөрөөдөлтэй, гэхдээ өөрт оногдсон дүрээ бусдаас өөрөөр гаргах гэсэн мэрийлттэй, урлагийн мундаг, ах, эгч нарыгаа харж урам зориг авч, "Ийм л болно доо" гэж битүүхэн мөрөөдөөд л эхэлсэн нь гарцаагүй болов уу. Урлагт уран бүтээлч гэх тодотгол багтахаар зорин яваа хэн бүхэн ийм гэгээн мөрөөдлөөр жигүүрлэн алхдаг байх. Т.Хулан гэх эгэл даруухан уран бүтээлч ч мөн сургуулиа төгсөөд ийн бодож, хичээж, зорьж байсан нь лавтай. Азтайгийн дотор бүр анхны олон ангит киноны дүрээрээ үзэгчдэд хүрч, түүгээрээ өдгөө хүртэл хайрлагдаж яваа. Түүнээс хойш харин “Намрын синдром”, “Хайрын рекорд” , "Зөрлөг", "Чиний эзгүйд", "Хайрыг хайрла", "Мама Миа", "Хэнд ч хэлээгүй нууц" зэрэг киноны гол болон туслах дүрд тоглосноор үзэгчдийн эчнээ танил уран бүтээлч болсон. Түүний цовоо сэргэлэн үзэсгэлэнтэй төрх бол урлагт ёстой ус агаар мэт хэрэгтэй байхаас гадна залуу үзэсгэлэн, мөрөөдөл дүүрэн охины дүрд бол ёстой ав цав нийцдэг гэмээр. Эдгээр дүр нь түүний даруу төлөв зан чанарыг багагүй эвдсэн, задалсан гэдгийг ч тэр өгүүлсэн.

Тэрбээр "Би өөрөөсөө өөр дүр бүтээхийг хүсдэг. Жүжигчин хүн өөрийгөө эвдэж, өөрөөсөө өөр хүнийг төрүүлж байж уран бүтээл үнэ цэнтэй болдог" гэж ярьсан байдаг. Хэсэгтээ дэлгэцэд өөрийнхөө авьяас билгийг чамгүй үзүүлсэн тэр харин драмд ч мөчөө өгөхгүй чамбайхан дүрээ гаргаж чаддаг чадварлаг эмэгтэй. Түр тайзнаас завсарлага авсан тэр харин тайзнаа сайн хүний дүрээр эргэн иржээ. Өнөөх л янзаараа драмын тайзан дээр гялтганаж, өөрийгөө хэрдээ сорьж, сойж, өөрөөр харуулах гэж зорьж, ажиллаж, хичээсэн нь харагдаж байв. Нөгөө талаар тэр дунд үеийн нуруутай, жигдэрч, жимбийж яваа уран бүтээлч гэдгээ ч харуулж, багагүй намба зааж байгаа нь илэрхий байв. Иймийн учир бид урлагт өөрийнхөөрөө гэрэлтэн гийж яваа түүнийг онцлон хүргэж байна.

-ДАРУУХАН ДОТОГШОО Т.ХУЛАНГААС НЭЭЛТТЭЙ УРАН БҮТЭЭЛЧ БОЛСОН НЬ-

Тэр дунд сургуулийн охин байхдаа бүрэг даруухан, дотогшоогоо охин байсан гэдэг. Харин урлагт хөл тавьснаас хойш нээлттэй болж, өөрийгөө илүүтэй задлан нээж, авьяасаа тордон, усалж, зүлгүүрдсээр урлаг гэх уулын орой мацаж яваа идэр уран бүтээлч. Нэг тийм тасхийсэн үг яриатай, шулуун шударга гээд олон сайхан чанар түүнийг энэ замд хөтөлж, хөгжүүлж яваа аж. Түүний анхы дүрийн нэг бол “Норовын намтар”-ын Жимсээгийн дүр. Номонд дуртай жаахан охины дүр бол цэл залуухан Т.Хулан. Үргэлж гэгээн сайхныг мөрөөдөж, орчлон ертөнцийг гэгээн өнгөөр төсөөлөн, уншихын их амтанд автаж, бүр амьдардаг охины дүр.

Урлаг түүний даруу төлөв зан чанарыг хуу татан, авьяасыг нь задалж, нээж, өнгөлж өгсөн

Тэрбээр “Жимсээ бол хамгийн цагаан гэгээлэг номонд дуртай хүүхэд гэж ойлгож болно. ХХ зууны хүүхдүүд ном уншдаг байсан бол ХХI зууны хүүхдүүд компьютероор амьсгалах болсон” гэж ярьсан байдаг. Ийм нэг гэгээхэн охины дүрийг хүүхэд багачуудын зүрх сэтгэлд үлдээж, түүний гэгээн инээд, хөөрхөн харц хүүхэд бүхний сэтгэл үлдсэн гэхээр бусад уран бүтээлчээс ялгарах нэгэн онцлог болов уу. За тэгээд л мэдээж нас болоод гоо үзэсгэлэнтэй залуу уран бүтээлчийн хувьд хайр дурлалын кинонд түлхүү тоглосон. Түүнд зохисон гэмээр дүрүүд ч гарсан. Тэр дундаа "Сарны нулимс" киноны Цоомоо бол оюутан залуу эмэгтэйчүүдийн бодит амьдралын дүр. Залуус нэгэндээ атаархаж, амьдралыг нь баллах зүйл бишгүй. Үүнд багагүй хохирон үлдэж байгаа дүр бол Цоомоо. Т.Хуланг урлагт бат бөх суулгаж өгсөн дүр бол яах аргагүй эл дүр. Одоо ч хүмүүс "Сарны нулимс" киноны Цоомоо л гэдэг болов уу. Дэлгэцэд тэр ийн хэдэн сайхан бүтээлтэй. Сүүлд харин "Түцний охид", "Гэрлэн дохио" зэрэг кинонд ч өөр, өөр дүрийг гаргаад амжсан. Юутай ч тэр даруу төлөв, дотогш охиноос аальгүй, хэрсүү, хөгжилтэй сэргэлэн эмэгтэйн дүрийг гаргатлаа урлагт хөгжиж, хувь хүнээ ч чамгүй нээсээр яваа.

"Сарны нулимс" киноны Цоомоо бол Т.Хулан гэх уран бүтээлчийг урлагт бат бөх суулгаж өгсөн дүр

-АДТАЙ , СЭРГЭЛЭН ЦОВОО, САХИЛГАГҮЙ ЦЭНГЭЛ-

Түүний нэгэн тодотгол энэ. Оюутан ахуй цагаасаа л уран бүтээлд тоглож эхэлсэн тэрбээр урлагийнхан дундаа алаг нүдэн, сайхан инээмсэглэлтэй охидын нэг байсаар ирсэн. Түүний энэ л тодотголыг бататгах уран бүтээл "Намрын синдром" киноны Цэнгэлийн дүр. Адтай, сэргэлэн цовоо, салхилгагүй мөртлөө зальтай охины дүр түүнд тун зохицсон. Мөнхүү өөртөө итгэлтэй, ямар чүед өөрийгө хөөрхөн гэж боддог галтай охины дүр бол түүнийг урлагт өөрийгөө илүүтэй нээж, задалж, боловсруулж чадах уран бүтээлч гэдгийг илүү тодруулж өгсөн. Магад даруухан, ичимхий, зөөлөн дуутай Т.Хулан хэвээр байгаад л байсан бол юун Цэнгэлийн дүр манатай. Харин өөрөөсөө өөр байж, өөрийнөө хэлснээр хувь өөрийг зуун хувьд эвдэж, эсгэж, галзуу эрх танхи охины дүрийг гаргаж чадсан нь түүний том сорилт, өөрчлөлт. Цэнгэлтэй мөн агаар нэгэн дүр бол "Мама Миа" киноны дүр. Мөн л сахилгагүй, эрх танхи, гэнэн итгэмтгий охины дүр. Үргэлж хөгжилдөж, инээж, бусдыг ч хөнгөн шоглочихно. Үндсэндээ нэгэн хэвийн урсгал дөлгөөн Хулангаас асаж, дүрэлзэж, ноцож чадсан эл дүрээрээ тэр "Аан энэ Хулан чинь "Сарны нулимс" киноны зөөлөн, дуугүй Цоомоогоос өөр юм гээч" гэсэн бодлыг төрүүлж, түүнээс ямар ч дүр, уран бүтээл гарч мэдэх юм байна" гэсэн итгэлийг өгч, өөртөө ч том урам авсан уран бүтээлч.

"Намрын синдром" киноны Цэнгэлийн дүрээр өөрийгөө илүү тод харуулж чадсан

-УРАН БҮТЭЭЛЧ БОЛОХ ҮНДЭС ХААНААС УРГАВ-

Урлагийн хүн болох хүсэлдээ хөтлөгдөн сургуулиа төгсөөд жүжигчин болох шийдвэр гаргахад гэрийнх нь дургүй байсан гэдэг. Учир нь ээж нь жүжигчний мэргэжилтэй ч мэргэжлээрээ ажиллаж чадаагүй бөгөөд амьдралын эрхээр Америкад 10 жил ажиллажээ. Тиймээс л тэр ээжийнхээ хийж, хүсэл мөрөөдлөө биелүүлж чадаагүйг биелүүлэхээр эл мэргэжлээр сурсан байна. Зөвшөөрөхгүй болохоор нь гэрийнхэндээ өөр сургуульд орж байгаа гэж хэлээд л өнөө алдарт СУИС-д шалгалт өгөөд тэнцсэн гэдэг. Ингээд нэгэнт тэнцсэн юм чинь гээд гэрийнхэн нь зөвшөөрснөөр өдгөө урлагт алхах эрхийн бичгээ өвөртөлсөн байдаг. Тэгээд сургуулиа төгсөөд Х-ТҮЦ гэх их айлаас ажлын гараагаа эхэлж, дараа нь Улсын драмын эрдмийн театр гэх өндөр босготой их айл руу орж, өөрийн авьяас билгээ сорьж, мундаг туршлагатай уран бүтээлээс суралцаж эхэлжээ. Театрт тэрбээр "Найзууд", "Бооцоо", "Хориотой жүжиг", "Хайрын виз", "Нууц амраг чинь больё", "Гамлет", "Лусын дагина", "Норовын намтар" зэрэг жүжигт гол болон туслах дүрд ажиллаж байжээ. Үүнээс "Лусын Дагина" жүжгийн дагинын дүрээрээ "Гэгээн муза" хүртэж байсан байна.

Энэ бол түүний сургуулиа төгсөөд ид драмын театрт ажиллаж байсан он жилийн уран бүтээлийн жагсаалт. Тэгээд хэсэг театраас завсарлага авч байгаад энэ жил эргэн их театраа орж, шинэ жүжгийн гол дүрд өөрийгөө сорьсныг үзэгчид андахгүй байх.

Германы алдарт зохиолч Бертольт Брехтийн "Сычуаны сайн хүн" жүжгийн Шин Тэ, Шу Тэ гэсэн эрэгтэй, эмэгтэй хоёр дүрд ажиллаж, үзэгчидтэйгээ уулзсан. Үргэлжийн зөөлөн дөлгөөн, ааль хонгор дүрээр харж, түүнд нь дассан үзэгчдэд гэнэтийн байснаас гадна хувь уран бүтээлч өөрийгөө эвдэж, илүү их задлах гэж хичээсэн нь илэрхий байв. Гэсэн ч зөөлөн турьхан чанар нь мэдрэгдэж, цовоо сэргэлэн, сайхан эмэгтэйн дүрд л илүүтэй тохирох юм байна гэсэн бодлыг ч хувь үзэгчийн хувьд ургуулж байв. Тийм боловч хоёр цаг гаруйн хугацаан дахь жүжгийг хоёр хүний дүрээр маргаангүй ганцаараа голлон нуруун дээрээ үүрч гарсан нь уран бүтээлчийн хувьд жигдэрч, жин дарж, илүү буйр зааж байгаа нь дунд үеийн магнатад гарч ирснийг ч илтгэж байв. Гэхдээ Т.Хулан бол урлагт байх л ёстой зөөлөн гэгээн инээмсэглэл мөн билээ. Шүр, сувд мэт чамин дүрийг тэр дэлгэц болоод тайзан дээр гаргаж, цаашид ч гаргасаар байх уран бүтээлч.

Сайн хүнийн дүрээр театртаа эргэн ирсэн түүний дараагийн нүүдэл юу байх бол...

Тайзны хувьд ийм амжилттай байгаа бол дэлгэцийн бүтээлд дахин нэгэн дүрийг тун саяхан нэмэн төрүүллээ. Найруулагч Д.Галбаярын "Эмэгтэйн кэйс" киноны гол дүрд ажиллаж, өмнөх дурлалт охин, зөөлөн намуун дүрээсээ илүү эрс шулуун, бие даасан, зоригтой, зорьсондоо заавал хүрдэг дүрд тоглосон байна. Ерөөс дүрийн хувьд тэр илүү чамбайрч, өсөж, илүүтэй төлөвшиж байгаа нь бүтээлээс бүтээлийн хооронд илэрхий. Одоо "Нутгийн зүг" киноны дүрийг нь хүлээж байна.

ГЭГЭЭН ИНЭЭМСЭГЛЭЛ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 6

Сэтгэгдэл үлдээсэн: 2023-12-30 17:03:08

zoch8n: Haraad hair hurmeer huurhen goe ohin shuu.Denduu tsarailag tursen .daruuhan dulgeen ohin chamdaa horvoogiin hamgiin saihan buhniig husen ereie.
Сэтгэгдэл үлдээсэн: 2023-12-30 14:58:23

Д.Маналсүрэн. : Ямар игоё жүжигчин бээ? Том ирээдүй бна даа. Амжилт хүсэе.
Сэтгэгдэл үлдээсэн: 2023-11-01 08:35:17

Зочин: Дурламаар сайхан бүсгүй шүү
Сэтгэгдэл үлдээсэн: 2023-10-31 11:13:44

Хандсүрэн: Ёстой хөөрхөн жүжигчин шүү! Тэр ярьж; хэлж; уйлж байгаа дүр нь үнэнхүү сэтгэлэээсээ гардаг! Сайхан охин
Сэтгэгдэл үлдээсэн: 2023-01-21 15:47:54

Saihn : Aldaa onootoi horvood saihan amldraad yavaarai saihn ******** bolson bn bayrhurgye
Сэтгэгдэл үлдээсэн: 2022-12-15 08:47:40

а: сайхан бүсгүй