ХАНГАРЬД ОРДНЫГ МАН-ЫН 13 ТӨЛӨӨЛӨГЧ ОРХИЖ БАЙГААГААС ХАМГИЙН ХОЖООТОЙ НЬ 2.6 ТЭРБУМ ТӨГРӨГИЙН ХАДГАЛАМЖТАЙ Б.НЭРГҮЙ

Б. Цогтбаяр:
Эрэн сурвалжлах

2024-10-04, 1246

НИТХ-д 2020 онд МАН 34 суудал авч, олонх болсноор өнгөрсөн дөрвөн жил хотод засагласан. Улмаар өнгөрөгч УИХ-ын сонгуулиар МАН-ын 34 төлөөлөгчөөс гурав нь буюу Ж.Алдаржавхлан, Н.Алтаншагай, Н.Батсүмбэрэл нар Хангарьд ордныг орхиж, Төрийн ордонд түшээ болж буурь сэлгэсэн. Үлдсэн 31 төлөөлөгчөөс 18 нь Х.Нямбаатараас хөтлөөд, НИТХ-д улирахаар дахин нэр дэвшиж буй. Ингээд үлдсэн 13 төлөөлөгч нь ачаа бараагаа баглаад, Хангарьд ордныг орхиж байна.

Тухайн 13 төлөөлөгчийн заримынх нь тэтгэвэртээ суух цаг нь болж. Зарим нь өнгөрсөн дөрвөн жил хотоос авахаа авсан тул “хоёрдугаар ээлж”-ийнхэндээ хүслээрээ зайгаа тавьж, Хангарьд ордныг орхиж байна. Харин зарим нь МАН-ынхаа “гал тогоо”-нд бэлтгэгч, тогоочоор дуудагдаж, Тусгаар тогтнолын ордонд буурь сэлгэж байна. Хоёр туулай хөөснөөсөө болж Хангарьд ордноос “хөөгдөж” байгаа төлөөлөгч ч байна.

Н.Баярмөнх- БЗД-ийн Засаг даргын ажлаа өгч, өнгөрөгч УИХ-ын сонгуульд нэр дэвшээд унасан. Хотын МАН-ын хорооны дарга Х.Нямбаатар УИХ-д нэр дэвшээд унасан хүмүүсийг НИТХ-д нэр дэвшүүлэхгүй гэж шийдвэрлэсэн тул Н.Баярмөнх энэ сонгуулийг өнжиж байна. Өөрөөр бол, түшээгийн сэнтийд шунаад төлөөлөгчийн ч сэтэргүй хоцорч буй нь энэ. Сонирхуулахад, Х.Нямбаатарын энэ шийдвэр БГД-ийн Засаг дарга Ө.Сумъяабаатарт үйлчлээгүй. Өөрөөр бол, өнгөрөгч УИХ-ын сонгуулиар БГД-т нэр дэвшээд унасан Ө.Сумъяабаатар одоо НИХТ-д БГД-ээсээ нэр дэвшиж буй. Ж.Мөнхбатын найз, Ж.Ганбаатарын “цэрэг” гэх мэт “том ар”-ууд нь нөлөөлсөн байж болох.

Г.Гангамөрөн- Нийслэлийн өмчит “Улаанбаатар хотын хөрөнгө оруулалт, менежмент” ХК-ийн гүйцэтгэх захирлаар томилогдоод удаагүй байгаа. Энэ компани нь нийслэлд хэрэгжүүлж буй бүх том төслүүдийн хөрөнгө санхүүг хариуцдаг. Жишээ нь, “Улаанбаатар хотын хөрөнгө оруулалт, менежмент” ХК-ийн босгосон “Улаанбаатар бонд”-ын 500 тэрбум төгрөгөөр хотын авто замуудын бордюруудыг сольж, мөн “Бөөрөлжүүт”-ийн цахилгаан станцыг санхүүжүүлж байгаа. Тэгэхээр Г.Гангамөрөн НИТХ-ын төлөөлөгчид дахин өрсөлдөхгүй шаардлагагүй, түүнээс ч том албан тушаалд оччихсон байгаа гэсэн үг.

Б.Сүхбаатар- Хаа байсан Говь-Алтай аймгийн МАН-ын хорооны даргаар томилогдоод байгаа. Энэ орон нутгийн сонгуулиар Говь-Алтай аймгийн ИТХ-д МАН олонх болбол Б.Сүхбаатар Говь-Алтай аймгийн Засаг дарга болох тохироотой очсон.

Р.Дагва- Өдгөө 58 настай. 2006 оноос хойш Хангарьд ордноос холдоогүй. НИТХ-ын даргаар ч ажиллаж байсан. Өөрөөр бол, Р.Дагва энэ сонгуулиар тэтгэвэртээ суухаар залуустаа зайгаа тавьж өгч байна. Харин хүчээр үү, хүслээрээ юу гэдэгт Х.Нямбаатар, Р.Дагва хоёр л хариулж чадах байх.

Б.Мөнхцэцэг- Тэртээ 2006 оноос хойш 18 жил тасралтгүй СХД-ийн 7, 25-р хорооны Засаг дарга, СХД-ийн ИТХ-ын дарга, НИТХ-ын төлөөлөгч, Нийслэлийн хот тохижилтын газрын даргы албан тушаалыг хашиж байгаа. Хотын дарга Х.Нямбаатар 2012-2016 онд СХД-ийн ИТХ-ын даргаар ажиллаад УИХ-ын гишүүн болмогц Б.Мөнхцэцэг түүний халааг авч, 2016-2020 онд СХД-ийн ИТХ-ын даргаар ажиллаж байв. Насны хувьд, дээр дурдсан Р.Дагватай чацуу. Тэгэхээр Хотын МАН-ын хорооны дарга Х.Нямбаатар Сонгинохайрхан хэмээх суугуул нутгийнхаа эгч Б.Мөнхцэцэгийг энэ сонгуулиар эелдэгээр тэтгэвэрт нь суулгаж буй нь энэ. Гэхдээ Б.Мөнхцэцэг Нийслэлийн хот тохижилтын газрын даргын албан тушаалаа хашиж байгаа.

Ч.Раднаабазар- НИТХ-ын төлөөлөгч, Налайх дүүргийн Засаг даргаар сүүлийн найман жил ажилласан. Тэртээ 1996 онд Х.Нямбаатарыг ахлах сургуулиа төгсөж байх үед Ч.Раднаабазар ХУД-ийн Соёлын ордны захирал байлаа. Тэгэхээр түүний хувьд хүссэн ч, эс хүссэн ч явах цаг нь болсон.

Б.Одсүрэн- Нийслэлийг “бетонон ширэнгэ” болгоход гол хувь нэмэр оруулж буй “Тайм констракшн” ХХЗ-ийн эзэн. Харин ч дөрвөн жил НИТХ-ын төлөөлөгчийн суудалд тухалж, тэр байтугай Д.Сумъяабазарын үед Зам тээврийн асуудал хариуцсан төслүүдийн удирдагчаар ажиллаж байсан нь түүний хувьд зол, завшаан. Өнгөрсөн дөрвөн жил ах, дүү нартаа даатгасан бизнесүүдээ одоо өөрөө удирдах цаг нь болсон биз. Дээрээс нь, Х.Нямбаатар олны хэл амнаас айсных уу, Д.Сумъяабазарыг Хотын дарга байх үед ойр шадарлаж байсан хүмүүсийг нэр дэвшүүлэхгүй авч үлдсэний нэг нь Б.Одсүрэн гэдгийг дурдах нь зүйтэй.

Г.Төгөлдөр- Хотын дарга асан Д.Сумъяабазарын баз хүргэн бөгөөд түүний “Үндэсний хөрөнгө оруулалтын банк”-ны Тэргүүн дэд захирлаар ажиллаж байсан. МАН-ын “ногоон автобус”-ны хэргийн дуулиан дахин сэдрэхээс сэргийлж, орон нутгийн сонгууль дуустал Д.Сумъяабазарыг олны анхааралд өртүүлэхгүй байхаар “тас нууж” байгаа. Энэ шалтгаанаар Г.Төгөлдөрийг өнжөөсөн байж болзошгүй гэсэн үг.

Б.Өнөбат- “МИАТ” ТӨХК-ийн “БОИНГ-787-9” агаарын хөлгийн даргаас шууд НИТХ-ын төлөөлөгч болж, дөрвөн жил суусан. Хангалттай гэж үзсэн биз.

Б.Пүрэвдагва- МАН-ын Намын байгуулалтын газрын даргын албан тушаалтай. Мөн хагас сарын өмнө МАН-ын дэргэдэх СДМЗХ-ны Ерөнхийлөгчөөр томилогдсон. Өөрөөр бол, ирэх дөрвөн жил МАН-ынхаа гал тогоонд ажиллах даалгавар, тохироотойгоор энэ сонгуулийг өнжиж байгаа гэсэн үг.

М.Халиунбат- Хангарьд ордныг хүслээрээ орхиж буйгаа албан ёсны цахим хуудсаараа илэрхийлсэн. Тухайлбал, М.Халиунбат “Найман жил нийслэлийн иргэдийг төлөөлж ажиллалаа. Аялалаа одоо дуусгаж байна” гэжээ.

Д.Энхбаяр- Нийслэлийн гэр хорооллын дахин төлөвлөлтийн төслүүдийг гүйцэтгэгч “Шинэ гэр түншлэл” ХХК-ийн эзэн. Тэр 2020 онд НИТХ-д төлөөлөгч болсноосоо хойш “Шинэ гэр түншлэл” ХХК-аараа БЗД-т 16 давхар, 15 блок бүхий 1500 айлын “Найрамдал” хороолол, ХУД-т 9-22 давхар, дөрвөн блок бүхий 256 айлын “Гэгэ ресиденс” хотхон гэх мэт нүсэр төслүүдийг хэрэгжүүлж байгаа. Тэгэхээр Хангарьд ордноос явахад түүнд харамсах зүйл үгүй биз.

Харин Хангарьд ордныг орхиж буй 13 дахь төлөөлөгч нь Б.Нэргүй. Хэдий Хангарьд ордныг орхиж буй ч түүнд харамсах зүйл байхгүй. Тэр цаашид төлөөлөгч гэгдэхгүй ч тэрбумтан гэж дуудагдана. Өөрөөр бол, Хангарьд ордныг хамгийн хожоотой орхиж буй төлөөлөгч нь Б.Нэргүй ажээ.

Тодруулбал, Б.Нэргүй УИХ-ын гишүүн асан Б.Баттөмөрийн “Ойн бирж” ХХК-ийн салбарын эрхлэгчээр 10 жил, Налайх дүүргийн Засаг дарга асан Б.Баяндэлгэр зөвлөхөөр гурван жил ажиллаад, 2016 онд Налайх дүүргийн ИТХ-ын дарга болж, дөрвөн жил дархлагдсан. Ингээд 2020 онд Налайх дүүргээсээ НИТХ-ын төлөөлөгчөөр сонгогдож байв. Тэгвэл Б.Нэргүй Налайх дүүргийн ИТХ-ын дарга байхдаа буюу 2017 онд 265 сая төгрөгийн орон сууцтай, хадгаламжиндаа 64 сая төгрөгтэй байжээ. Харин долоон жилийн дараа буюу одоо тэр 1.4 тэрбум төгрөгийн орон сууцтай, 2.6 тэрбум төгрөгийн хадгаламжтай болоод Хангарьд ордноос явж байна.

Хоржоонтой нь, НИТХ-ын төлөөлөгч Б.Нэргүйд орлогоо ингэж огцом өсгөх хэмжээний бизнес алга. Өөрөө нэр дээрээ бизнесгүй. Эхнэр С.Хэнчбиш нь л “Номбул-Эрдэнэ” ХХК-ийг эзэмшдэг. Гэхдээ “Номбул-Эрдэнэ” ХХК нь Налайх дүүрэгт “Мандах” нэртэй супер маркет л ажиллуулдаг. Супер маркетийн орлогоор 2.6 тэрбум төгрөгийн хадгаламжтай болсон гэвэл үнэмшилгүй түүх болно. Тэгэхээр яаж гэдэг асуулт гарч ирнэ. Магад, энэ асуултын хариулт нь Б.Нэргүйг Хангарьд ордныг орхих шалтгаан болсон ч байж болох юм.

ХАНГАРЬД ОРДНЫГ МАН-ЫН 13 ТӨЛӨӨЛӨГЧ ОРХИЖ БАЙГААГААС ХАМГИЙН ХОЖООТОЙ НЬ 2.6 ТЭРБУМ ТӨГРӨГИЙН ХАДГАЛАМЖТАЙ Б.НЭРГҮЙ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.