Өнөөдөр, маргааш зүүн аймгуудын нутгийн зарим газраар цас орж, явган шуурга шуурна. Салхи говь, тал, хээрийн нутгаар секундэд 15-17 метр хүрч ширүүсэх гэнэ. Өнөөдөр нутгийн баруун хагаст, маргааш ихэнх нутгаар хүйтний эрч суларна гэдгийг Цаг уур, орчны шинжилгээний газраас мэдээллээ.

Увс нуур болон Дархадын хотгор, Завхан голын эх, Хүрэнбэлчир орчим, Тэс, Халх голын хөндийгөөр шөнөдөө 32-37, өдөртөө 20-25 хэм, Алтай, Хангай, Хөвсгөл, Хэнтэйн уулархаг нутаг, Идэр, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн голын хөндий, Дарьгангын тал нутгаар шөнөдөө 25-30, өдөртөө 14-19 хэм хүрнэ. Цас багатай энгэр ээвэр газраар шөнөдөө 11-16, өдөртөө 0-5 хэм, бусад нутгаар шөнөдөө 19-24, өдөртөө 8-13 хэм хүйтэн байна.