Хүүхдийн төлөө сайн дурын байгууллага болох Хүүхдийн төлөө фондын хөрөнгө хуримтлуулах үйл ажиллагаа өчигдөр зохион байгуулагдаж нийтдээ 2.2 тэрбум төгрөгийн хандив босгосон байна. Энэхүү арга хэмжээнд Монгол Улсын Дархан аварга Д.Бат-Эрдэнийн дээл, олимпийн аварга Н.Түвшинбаярын кимоног дуудлагаар худалдаж, хөрөнгө оруулалт хийлээ. Тухайлбал, Монгол Улсын Хөдөлмөрийн баатар, гавьяат тамирчин, дархан аварга Бадмаанямбуугийн Бат-Эрдэнийн дээлний дуудлага худалдааны анхны үнэ нь есөн сая төгрөгөөр тогтож, 38.5 сая төгрөгөөр зарагдав. Харин Монгол Улсын Хөдөлмөрийн баатар, гавьяат тамирчин, олимпийн алт, мөнгөн медальт Найдангийн Түвшинбаярын кимоногийн дуудлага худалдааны анхны үнэ нь есөн сая төгрөгөөр тогтож, 25 сая төгрөгөөр зарагдлаа.

Мөн энэ үеэр Монгол Улсын хөдөлмөрийн баатар, гавьяат тамирчин, олимпийн алтан медальт Энхбатын Бадар-Ууганы боксын ширэн бээлийний дуудлага худалдааны анхны үнэ нь 9 сая төгрөгөөр тогтож, 21 сая төгрөгөөр, Тод манлай уяач Э.Эрдэнэчулууны Монгол төрийн наадамд зургаа түрүүлсэн домогт хурдан ажнай шаргын удам хээлтэй гүүний дуудлага худалдааны анхны үнэ нь 99 сая төгрөгөөр тогтож 200 сая төгрөгөөр тус тус зарагдсан байна.