Нийслэлийн Баянзүрх дүүрэгт коронавируст халдварын нөхцөл байдал хүндэрсэнтэй холбоотойгоор  нийтийн тээврийн үйлчилгээ эрхлэгч аж ахуйн нэгж байгууллагуудад Нийслэлийн онцгой  комиссоос үүрэг өгчээ. Үүнд  Баянзүрх дүүргийн нутаг дэвсгэрээр дайран өнгөрч, үйлчилгээнд явдаг автобуснуудын ариутгал халдваргүйтгэлийг сайтар хийх, тэдгээрт ажиллаж буй жолооч нарт халдвар хамгаалалтын  дэглэм мөрдүүлэх, тэднийг ажилчдын тусгай автобусаар тээвэрлэх үүрэг өгсөн байна.

Баянзүрх дүүргийн нутаг дэвсгэрээр дайран өнгөрч буй нийтийн тээврийн үйлчилгээ эрхэлдэг 16 байгууллага, 45 чиглэлд ажлын өдөр 474 автобус үйлчилгээнд явж байна. Харин  амралтын өдрүүдэд 351 автобус  нийтийн тээврийн үйлчилгээ үзүүлдэг байна. Нийтийн тээврийн үйлчилгээний газрын авто тээврийн хяналтын улсын байцаагчид Баянзүрх дүүргийн нутаг дэвсгэрт  хөдөлгөөнт болон суурин байршилд дөрвөн байршилд хяналт, шалгалтыг хийж байна.

Мөн Баянзүрх дүүргийн гурван байршилд судалгаа хийж, ачаалал ихтэй чиглэлүүдэд ажлын өдрийн гаралтын тоог нэмэгдүүлэхээр санал боловсруулсан байна.

Өнөөдрийн 06:00-11:00 цагийн байдлаар нийслэлийн хэмжээнд 97 чиглэлд 924 тээврийн хэрэгслээр нийт 71230 хүн зорчжээ. Нийтийн тээрийн үйлчилгээнд гарч буй автобуснуудад халдвар хамгааллын дэглэмийг өдөр бүр мөрдүүлэн  ажиллаж байгаа талаар мэдээллээ.