Архангай аймгийн Онцгой байдлын газрын Шуурхай штабын дарга, ОБГ-ын дарга хурандаа Д.Эрдэнэбаатар, шуурхай штабын менежер, ЭМГ-ын дарга Р.Гандиймаа нар мэдээлэл өглөө.

Архангай аймагт коронавирусийн батлагдсан тохиолдол гурав болсон. Гурав дахь тохиолдол нь анхны тохиолдлын гэр бүлийн хүн бөгөөд тусгаарлалтад орсон байгаа гэлээ. Аймгийн шуурхай бүлэг болон тандалтын бүлэг Батцэнгэл суманд ажиллаж байна. Өнөөдрийн байдлаар PCR шинжилгээ хийдэг явуулын лабораторт нэг эмч, нэг генетикийн мэргэжилтэн ажиллаж байна. Өнөөдрөөс нэг тархвар судлаач эмчийг нэмж ажиллуулахаар болсон байна. 

“Бид ойрын 58, дам хавьтлын 400 гаруй хүнийг тодорхой болгож аваад байна. Өнөөдрийн байдлаар 190 хүний шинжилгээний хариу гарсан. Нэг хүний шинжилгээ эерэг, бусад хүнийх сөрөг гарснаар батлагдсан тоо нэгээр нэмэгдлээ. Аймгийн Онцгой комисс, суманд ажиллаж буй шуурхай бүлгүүд, сумын Онцгой комисс хариу арга хэмжээг яаралтай авч ажиллаж, хоёр өдрийн дотор 553 хүний сорьцыг цуглуулж ажилласан. Тархвар судлалыг хийж, эхний маршрутыг бүрэн гаргаад байна. Ер нь бол бид голомтыг хяналтандаа авч чадсан. Одоогийн байдлаар тархвар судлалын ажил үргэлжилж байна. Ихтамир сумын гурван иргэний PCR шинжилгээний хариу сөрөг гарсан. Журмын дагуу бид долоо хоногийн дараа хоёр дахь шинжилгээг авна. Одоо тусгаарлалтад байна. Цаашдаа АОК-оос 12 дугаарын сарын 02-ноос тав хоногийн хугацаанд Батцэнгэл сумын 3771, Ихтамир сумын 5200 иргэнийг “нэг иргэн-нэг шинжилгээ” хэлбэрээр буюу бүх хүнийг нэг бүрчлэн шинжилгээнд хамруулна. Энэ хоёр сумаас өнөөдрийн байдлаар нийлээд 700 гаруй иргэний шинжилгээг аваад байгаа. PCR шинжилгээний урвалж, бусад эм, эмнэлгийн хэрэгсэл, хамгаалах хувцас хэрэгсэл болон амьсгалын аппарат таван ширхэгийг ЭМЯ-наас шийдвэрлэж өгсөн. Шинжилгээ авахад хангалттай хүрнэ. Мэдээж хавьтлуудын дахин шинжилгээг авна” гэлээ.

Мөн “УОК-ын шийдвэрийн дагуу Улаанбаатар хотоос иргэн татахгүй. Аймгийн хэмжээнд 40 гаруй пост ажиллаж байна. Цаашид өвчлөл нэмэгдвэл Нэгдсэн эмнэлгийн Халдвартын тасгийн 30 ортой эмнэлгийг бэлдсэн байгаа. Энэ эмнэлгийг идэвхжүүлж, эндээ эмчилнэ. Батлагдсан гурван тохиолдлыг одоо Улаанбаатар хотод эмчилж байна.

Иргэдэд уриалж, сануулж хэлэхэд гэрээсээ бүү гар, мэргэжлийн байгууллагын өгч буй зөвлөмжийг сайн дагах, дархлаагаа дэмжих хоол хүнсийг хэрэглэх, гэртээ чийгтэй цэвэрлэгээ хийж, агаар сэлгэлтийг хоёр цаг тутам хийх, гэртээ зочин урихгүй, айлд зочлохгүй байх хэрэгтэй байна. Мөн зайлшгүй шалтгаанаар гадуур гарвал амны хаалт зүүх, хүн хоорондын зай барих, гэртээ орохдоо гадуур өмссөн хувцасаа уут саванд хийх, гараа угааж халдваргүйжүүлэх зэрэг энгийн аргуудыг маш сайн дагаж мөрдөж, дадал болгох шаардлагатай байна” гэв.