Орхон аймгийн иргэн Л.Билэгтсайхан эхнэрийн хамт Улаанбаатар хотод ирээд хөл хорионд орж, олон хоног машиндаа амьдарсан талаар хэвлэлүүд мэдээлсэн.

Тодруулбал, Л.Билэгтсайхан нь ходоодны хорт хавдраар өвчлөөд хоёр жил болсон бөгөөд ээлжит хяналтын үзлэгээ хийлгэж, томографик өгөхөөр энэ сарын 11-нд Улаанбаатарт ирсэн байна. Улмаар Хавдар судлалын үндэсний төвтэй ойрхон байрлах зочид буудалд хоёр хоноод харих төлөвлөгөөтэй байсан ч хөл, хорионд орж гацсан юм. Мөн түүний эхнэр сонсголын бэрхшээлтэй, өөрөө хувиараа хөдөлмөр эрхэлж, орлого олдог талаараа тэрбээр мэдээлж байв. Тэрбээр хөл хорионд орсон тул машиндаа 10 хоног амьдарч, ахуйн хийн плитка айлаас гуйн хэрэглэж, хоол идэж байгаа гэдгээ ч ярьсан. Энэ мэдээллийн дараа холбогдох албаныхан арга хэмжээ авч, түүнийг эхнэрийнх нь хамт нутаг буцаажээ. Энэ талаар тэрбээр цахим хуудастаа "Нийт ард түмнийхээ болон Монгол ТВ-ийн ачаар гэртээ харихаар явлаа, маш их баярлалаа" хэмээн нийтэлсэн байна.