Монгол Улсаас Бүгд Найрамдах Беларусь Улсад суугаа Онц бөгөөд Бүрэн эрхт Элчин сайд Г.Байгалмаа, Беларусь Улсын Байгалийн нөөц, байгаль хамгааллын сайд М.В.Лысенкотой 2026 оны долдугаар сарын 22-ны өдөр Байгалийн нөөц, байгаль хамгааллын яаманд уулзалт хийв. Уулзалтын эхэнд Элчин сайд Г.Байгалмаа Монгол Улс, Бүгд Найрамдах Беларусь Улсын уламжлалт найрсаг харилцаа, хамтын ажиллагаа улс төр, эдийн засаг, нийгэм, соёл, хүмүүнлэг зэрэг уламжлалт салбаруудад, түүнчлэн байгаль орчин, эрдэс баялаг, оюуны өмч зэрэг шинэ салбаруудад өргөжин тэлж буйд сэтгэл хангалуун байгаагаа илэрхийлж, хамтын ажиллагааны эрчийг хадгалан чанарын шинэ түвшинд гаргахыг зорьж буйгаа мэдэгдэв.

    Беларусь Улсын Байгалийн нөөц, байгаль хамгааллын сайд М.В.Лысенко Монгол Улстай хөгжүүлж буй харилцаандаа чухал ач холбогдол өгч ирснийг тэмдэглээд, Беларусь Улсын Ерөнхийлөгч А.Г.Лукашенкогийн 2024 онд Монгол Улсад хийсэн төрийн айлчлалын дүнд байгаль орчин, эрдэс баялгийн салбарт хамтын ажиллагааны эрх зүйн таатай орчин бүрдсэнийг онцлон айлчлалын үеэр хүрсэн тохиролцоонуудыг бодит ажил хэрэг болгохын төлөө буйгаа нотлов.

    Уулзалтын үеэр талууд Монгол Улсын Ерөнхийлөгч У.Хүрэлсүхийн санаачлан хэрэгжүүлж буй “Тэрбум мод” үндэсний хөдөлгөөний хүрээнд хамтын ажиллагаа хөгжүүлэх боломж, Улаанбаатар хотноо 2026 оны наймдугаар сард болох Цөлжилттэй тэмцэх тухай НҮБ-ын конвенцын Талуудын 17 дугаар бага хуралд беларусийн талаас өндөр түвшний төлөөлөгч оролцуулах бэлтгэл ажлын явц, Монголын уул уурхайн салбарын “Mongolia Mining” олон улсын үзэсгэлэнг түшиглэн хоёр улсын бизнес эрхлэгчдийн хооронд шууд холбоо тогтоох зэрэг асуудлаар санал солилцлоо.

    Түүнчлэн 2024 онд байгуулсан “Байгаль орчныг хамгаалах салбарт хамтран ажиллах тухай харилцан ойлголцлын Санамж бичиг”-ийн хэрэгжилтийг эрчимжүүлэх зорилгоор “Монгол Улсын Байгаль орчин, уур амьсгалын өөрчлөлтийн яам, Беларусь Улсын Байгалын нөөц, байгаль хамгааллын яам хооронд 2027-2029 онд хамтран ажиллах замын зураглал”-ын төслийг ойрын хугацаанд тохирч, гарын үсэг зурахаар тогтов.