“Армата” продакшны үүсгэн байгуулагч, залуу жүжигчин Б.Тэмүүжинтэй үзэгчдийн хүртээл болохоор зэхэж буй “Амьдралын хүрд” уран сайхны киноны талаар ярилцлаа.

-Сайн байна уу. Удахгүй киногоо нээх гэж буйд баяр хүргэе. Дүрийнхээ талаар яриагаа эхлэх үү?

                -Баярлалаа.  Миний хувьд түргэний жолоочийн найз Сүхээгийн дүрд ажилласан. Найзынхаа төлөө үргэлж санаа тавьж, туслахыг хичээдэг  залуу байгаа.  СУИС-ийн дээд үеийн ах нартайгаа найзууд болж тоглох сайхан байлаа.  

-“Амьдралын хүрд” уран сайхны кино нийгэм, залуучууд ямар мессеж өгөхийг зорьсон бэ?

                -Түргэн тусламжийн тэрэг эрдэнэт хүний амийг аврахын тулд  хэн нэгэнтэй бус минут, секунд бүртэй тэмцэлдэж явдаг. Тиймээс жолооч нар зам тавьж өгдөг байгаасай гэдэг л бидний хэлэхийг хүссэн гол санаа юм.  

-Үзэгч, уншигчид “Армата”-гийн Тэмка гэдгээр нь илүүтэй таних байх.  Цахим сүлжээнд нийтэлдэг хөгжилтэй бичлэгээсээ хувь хүний зан ааш өөр үү?

                -Ихэнх бичлэг дээрээ өөрөөрөө л байдаг даа. Би ер нь сэтгэл хөдлөл өндөртэй хүн.  Гэхдээ жаахан ичимхий, гудамжинд бичлэг хийх үедээ санаа зовоод байдаг юм.

-Танай продакшны сүүлийн үеийн сонин сайхнаас хуваалцаач?

                -Манай продакшн 2019 онд байгуулагдаж байлаа.  Өнгөрсөн  хугацаанд цахим сүлжээнд богино хэмжээний бичлэгүүд хийсэн. Харин одоо илүү мэргэжлийн түвшинд ажиллахыг зорьж байна даа.  “Армата” продакшны залуучууд бүгд  жүжигчин мэргэжилтэй.

-Бие даасан уран бүтээлүүд гаргасан шүү дээ. Залуу уран бүтээлчдэд тулгардаг асуудлуудын талаар яривал?

                -Бид өнгөрсөн жил нэг бүрэн хэмжээний кино хийж байгаад санхүүжилтийн асуудлаас болоод дутуу орхисон байгаа. Энэ зун зураг авалтаа дуусгаад намар нээх бодолтой байгаа. Ер нь тэгээд залуу уран бүтээлч бидэнд “Хийе, бүтээе” гэсэн их хүсэл, санаа байвч яах аргагүй санхүүгийн асуудал тулгардаг.

-Б.Тэмүүжиний хүүхэд нас хаана,хэрхэн өнгөрсөн бэ. Гэр бүлийнхээ талаар яриа дэлгээч?

                -Би Өвөрхангай аймагт төрж, өссөн.  Аав, ээж хоёр маань тогооч мэргэжилтэй хэдий ч  урлагийн авьяастай хүмүүс байдаг. Ээж цэцэрлэгийн багшаар ажиллаж байгаад намайг ахлах ангид орох жил СУИС-ийн лицей Бадмаараг ахлах сургуульд элсүүлж, өөрөө тогоочоор ажиллаж эхэлсэн. Гэр бүл минь намайг урлагийн хүн болоход их дэмжсэн.  Бага байхад аав дуулахыг минь сонсоод “Миний жүжигчин болно доо” гэдэг байсан. Аав болсноосоо хойш аав,ээжийгээ илүү ихээр хайрлаж, бахархаж байгаа. Аав болоогүй байхад хүмүүс “Ядарч орж ирээд, хүүхдээ үнэрлэхэд бүх ядаргаа алга болдог” гэхийг нь сонсоод гайхдаг байсан. Тэгээд өөрөө аав болсон чинь ёстой л тийм юм байна гэдгийг мэдэрч байна даа.

-Урлагийн хүн болох эхлэлийнхээ талаар дурсамжаасаа хуваалцаач. Хүүхэд байхын байхын урлагтай ойр байв уу?

                -Би нэгдүгээр ангиасаа л дуулж эхэлсэн. Тийм жоохон хүүхэд байж тайзан дээр гараад ямар ч сандралгүй эвлэгхэн дуулдаг байсан гэдэг.  Анх “Дуучин болно” гэсэн мөрөөдөлтэй 16 настай хүү Улаанбаатар хотод ирж байсан. Тэгээд арваннэгдүгээр ангид орох жилээ жүжигчний мэргэжилдээ дурлаж байсан даа. Гэхдээ дуучны мэргэжлээ бүр мөсөн орхиогүй. Одоо юүтүбд 20 гаруй дуу бий. Ихэнх хүмүүс “Танго” дууг минь мэдэх биз ээ. Энэ зун цаг боломж нь таарвал шинэ дуу гаргах бодолтой байгаа.

 -Өөрийгөө ямар дүрд сорьж үзэхийг хүсдэг вэ?

                -Би ихэвчлэн гэмгүй, хөгжилтэй залуугийн дүрд тоглодог. Одоо харин зэвүүн үзэгчдийг төөрөлдүүлж гайхшируулсан дүр бүтээмээр байна.  Инээж байгаад хүн алдаг алуурчин ч юм уу.  

-Залуу уран бүтээлчийн хувьд алсын хараа, төлөвлөгөө арвин байгаа байх. Цухасхан ирээдүйд юу бүтээхийг зорьж буй талаараа ярьж болох уу?

                -Ирээдүйгээ холоор харж, мөрөөдөж бага багаар хичээсээр, урагшилсаар байна.  Тухайн цаг үед нь нийтэд ил болгоод явна аа.

-Ярилцсанд баярлалаа. Цаашдын уран бүтээлд нь амжилт хүсье.

                 -Баярлалаа. Хүн бүхэнд төрөхөөс үхэх хүртэлх амьдралын хүрд бий. Тиймээс олдсон цаг мөч бүрээ хайрлаж яваарай. “Амьдралын хүрд” уран сайхны кино маань зургадугаар сарын 21-нд нээлтээ хийж, 28-наас бүх кино театраар үзэгчдийн хүртээл болно. Та бүхэн өргөнөөр ирж үзэхийг  кино багийнхаа өмнөөс урьж байна.