Хөвсгөлийн уудам талд гарааны бизнесээ эхлүүлэн аж төрж байгаа лаа урлаач Г.Дагиймааг бид жилийн өмнө сурвалжилж байсан билээ. Тэр үед зургаан төрлийн лаа урладаг байсан бол одоо бизнес нь хэрхэн өсөн дэвжсэн тухай нь “Эргэлтийн эргэх холбоо” буландаа эргэн сурвалжиллаа.

-Сайн сууж байв уу, биднийг ярилцсанаас хойш хэдийнэ нэг жил өнгөрчээ. Энэ хугацаанд танай үйлдвэрлэл, борлуулалтад хэр олон зүйл өөрчлөгдсөн бэ?

         -Сайн байна уу, дахин уулзаж байгаадаа баяртай байна. Нэг жилийн хугацаанд гарааны бизнес маань олон хүнд танигдаж, байнгын үйлчлүүлэгчидтэй болсон. Мөн хэд хэдэн газартай хамтарч ажиллаж байгаа. Анх эхэлж байсан үеэсээ илүү олон төрлийн лаа үйлдвэрлэж байна. Өмнө нь лаандаа шар буурцагны тос, зөгийн бал ашигладаг байсан бол одоо нэмэлтээр 100 хувь байгалийн гаралтай дээд зэргийн лааны түүхий эд болон кокосны тос ашиглаж байгаа. Өвөрмөц содон, өхөөрдөм төрхтэй лаанууд “Анхилуун” гар урлалын дэлгүүрийн онцлог хэвээрээ байгаа.

-Улаанбаатар хотын хэрэглэгчдэдээ хэрхэн бүтээгдэхүүнээ хүргэж байгаа вэ?

           -Хөвсгөл аймагтаа үйл ажиллагаа явуулсан хэвээр байгаа. Улаанбаатар хот болон бусад орон нутгийн үйлчлүүлэгчдэдээ “Монгол шуудан” болон хот хоорондын  тээврээр найдвартай, сав баглаа боодолд хийгээд хүргүүлж байгаа.

-Хамтран ажилладаг байгууллагатай болсон гэсэн. Ямар чиглэлээр хамтран ажиллаж байна вэ?

           -Бэлэн бүтээгдэхүүн борлуулах тал дээр хамтран ажиллах газартай болсон. Улаанбаатар хотод “Evelyn’s oven” кафе, Дархан-Уул аймагт  “Дархан зах” худалдааны төв, Хөвсгөл аймгийн Тэнхлэг их дэлгүүрийн “Bio lab” зэрэг худалдааны төвтэй хамтран ажиллаж, лаагаа борлуулж байгаа.

-Үйлдвэрлэл нь хэр өргөжсөн бэ. Хамтдаа “Анхилуун” дэлгүүрийг өргөжүүлэх баг, ажилчидтай болсон уу?

            -Анх гэрийнхээ жижигхэн булангийн ширээнээс эхэлсэн үйлдвэрлэл маань өдгөө бүтэн нэг өрөө болж өргөжсөн байна. Тусдаа байртай болоогүй ч худалдан авагч, захиалагчид нэмэгдсэн учраас ачаалалд тааруулан тоног төхөөрөмж нэмсэн.

-Өмнө нь “Анхилуун” гар урлал, бэлэг дурсгалын дэлгүүртэй болох зорилготой байгаагаа ярьж байсан шүү дээ. Зорилгодоо хэр ойртсон бэ?

           -Зорилго маань илүү том болсон. Аймагтаа бэлэг дурсгалын дэлгүүртэй болоод зогсохгүй Улаанбаатар хотод дэлгүүрээ нээхээр ажиллаж байгаа. Мөрөөдөл төдий байсан зүйлээ ажил болгож эхэлсэн. Одоогоор 40 хувийн гүйцэтгэлтэй байна. Тун удахгүй илүү сайхан мэдээтэйгээр дахин уулзах байх аа.

-Одоо хэдэн төрлийн бүтээгдэхүүнийг үйлдвэрлэж байгаа вэ. Шинэ бүтээгдэхүүн гаргасан уу?

             -Одоогоор 43 өөр загварын лаа, хоёр төрлийн ваннын давс урлаж байна. Шинэ бүтээгдэхүүн гаргахдаа “Хэрэглэгчид юу хүсэж байгаа бол” гэдэг асуултын хариуг хайдаг. Гаргах бүтээгдэхүүнийхээ санааг хэдэн өдөр бодож, төлөвлөж, загварыг нь гаргана. Төсөөллөө бүтээгдэхүүн болгож, гартаа барих үеийн мэдрэмж үгээр хэлэхийн аргагүй сайхан. Шинэхэн бүтээгдэхүүнийхээ зургийг дарж хэрэглэгчдэдээ танилцуулах бол хамгийн догдлом хэсэг. Манайх сардаа 1-2 лаа шинээр гаргадаг. Байгаа загваруудаа ашиглаж, нэгэн хэвийн байхыг хүсдэггүй учраас үргэлж шинэчлэлд тэмүүлдэг.

-“Анхилуун” гар урлалын дэлгүүрийн ирээдүйг ямар байхаар төсөөлж байгаа вэ?

            -Ирээдүйд ямар ч бэрхшээл тулгарсан лааны соёлыг охид, бүсгүйчүүд, ер нь бүгдэд нь таниулсаар байхыг хүсэж байна. Дан ганц лаагаар зогсохгүй олон төрлийн органик бүтээгдэхүүн бүтээх болно. Жижигхэн булангаас эхэлсэн гарааны бизнесийнхээ ирээдүйг Монголдоо төдийгүй дэлхийд танигдсан алдартай брэнд болсон байгаагаар төсөөлөх дуртай. Төсөөлөөлөө бодит болгохоор шургуу ажиллаж байна.

Г.Дагиймаа бол дуртай зүйлээ ажил болгож, мөрөөдлөө биелүүлэхээр хичээж байгаа эмэгтэйчүүдийн төлөөлөл. Өрсөлдөөн ихтэй гар урлалын салбарт тэрбээр орон нутгаас гэлтгүй хэдийнэ байр сууриа олж, “Анхилуун” брэндийг сонгодог байнгын хэрэглэгчидтэй болоод байна.