Хүний амьдралын өдөр тутмын үйл явдал болон нийгэмд болж буй шүүмжлэлт асуудлыг зургаар илэрхийлдэг хүн бол Бат-Эрдэний Баттогтох. Тэрбээр зураач мэргэжлээр ажиллаад найм дахь жил рүү гээ орж буй залуу зураач юм. Түүнчлэн, 2019 онд анхны бие даасан “Reason to be” зургийн үзэсгэлэнгээ гаргасан билээ.

-Сайн байна уу. Та анхны үзэсгэлэнгээ хэр хугацаанд бэлдэж байж гаргасан бэ. Үзэсгэлэнгээ гаргаж байх үеийн сэтгэгдлээсээ хуваалцвал?

         -Сайн байна уу. Анхны үзэсгэлэнгээ гаргахын тулд таван жилийн хугацаанд бэлдсэн. Таван жилийн хугацаанд юуг сурч, яаж хөгжсөнөө уран бүтээлүүдээрээ дамжуулан харуулсан. Үзэсгэлэнгээ гаргах мөч үгээр илэрхийлэмгүй гайхалтай. Өөрийн харж буй өнцөг, хэлэхийг хүссэн санаагаа  зургаар илэрхийлснээ бусадтай хуваалцсанаар дотор онгойх шиг болсон. Үзэсгэлэнгээ гаргаад дууссаны дараа маш их тайвширсан.

-Зурах сонирхолтой байх, зураач мэргэжилтэй болоход ялгаа их бий. Та хэрхэн зураачийг мэргэжил болгохоор шийдвэрт хүрсэн бэ?

      -Би багаасаа л зурах дуртай байсан болохоор зураач мэргэжлийг сонгож, суралцсан. Гэхдээ хожим нь бодоход тэр үед урлагийн хүний амьдралыг тийм ч сайн мэдэхгүй, ойлгодоггүй байлаа. Гэнэн хүсэл тэмүүлэл, сэтгэлийн хөөрөл дүүрэн байсан юм шиг.  Урлагийг ойлгож, эргэлт буцалтгүй дурласан үе минь гуравдугаар курсийн оюутан болсон үе. Тухайн үед л урлагийн сайхан, муухайг бүрэн таньж, “Зураачаар амьдарна” гэж шийдвэр гаргасан. Тэр цагаас өдийг хүртэл жанжин шугамаа алдахгүй, өөрийгөө боловсруулсаар байна. Зургаар дамжуулан өөрийгөө илүү ойлгож, мөн чанараа гаргаж ирэх гэж хичээж байгаа.

-Таныг зураач болоход тань хамгийн их урам зориг өгч тусалсан хүн хэн бэ?

     -Гэр бүлийнхэн минь намайг үргэлж дэмжиж, тусалдаг. Тэр дундаас аавыгаа онцолмоор байна. Учир нь миний анхны багш бол аав минь. Манай аав зураач байгаагүй ч гарын ур дүй сайтай хүн байсан. Ямарваа нэгэн юмыг хурдан засчихдаг, байгаа юмыг яг байгаагаар нь зурж чаддаг, баримал сайн хийчихдэг хүн байлаа. Ер нь муухан зураачаас сайн зурдаг хүн байсан. Ааваасаа үлгэрлэж, аливаа зүйл хийж сурахын тулд тэсвэр, хатуужилтай байж сурсан даа.

-Уран бүтээлээрээ дамжуулан нийгэмд ямар дуу хоолойг хүргэхийг хүсдэг вэ?

   -Би зүгээр л гоё сайхан төдий уран бүтээл бүтээхийг хүсдэггүй. Уран бүтээл бүрээ өгүүлэмж, үзэл бодолтой байлгах гэж оролддог. Ямартай ч миний бүтээлийг хүн хараад “Тодорхой хэмжээнд ойлгож, илүү сайн хүн байхын тулд хичээдэг байгаасай” гэж хүсдэг.

-Уран бүтээлийн санаагаа хэрхэн олдог вэ?

     -Түүнийг би өөрөө ч хэлж мэдэхгүй юм. Нэг л мэдэхэд уран бүтээлийн санаа маань гэнэт л тархи руу орж ирдэг. Түүнийгээ мартахгүйн тулд маш хурдан бичиж үлдээдэг. Дараа нь түүнийг зурж байх явцдаа хөгжүүлж, боловсруулалт хийнэ. Анхны санаа чухал ч түүнийгээ төгөлдөржүүлэх мөн адил чухал.

-Таны хувьд зураач байхын сайхан болон хүндрэлтэй тал нь юу вэ?

     -Зураач байна гэдэг асар их хариуцлага, тэмүүлэл болон хүсэл мөрөөдөл. Зураачаар ажиллана гэдэг зөвхөн зурах биш видео,найруулагч, контент бүтээх гээд асар олон төрлийн зүйл хийдэг. Уран бүтээлч байхын тулд олон талын чадварт суралцаж, хөгжихийг нийгэм нь үргэлж шаарддаг. Зураг бүрээсээ өөр өөр мэдрэмжийг авдаг. Миний харах өнцөг зургаар дамжин өөр хэн нэгэнд ухаарал, урам зориг хайрлах нь хамгийн сайхан.

-Зураачаар ажиллах хугацаандаа олон бүтээл бүтээсэн байх. Уран бүтээлүүдээс тань хамгийн дурсамжтай нь ямар бүтээл вэ?

     - Надад хамгийн дурсамжтай бүтээл бол ээж болон ахын маань хөрөг. Мөн “Reason to be” гээд уран бүтээл байна. Анхны маань үзэсгэлэнгийн нэр, анхны уран бүтээлийн маань нэр. Энэхүү уран бүтээлээрээ дамжуулан эмэгтэй хүний амьдралын хэв маягийн талаар өгүүлэхийг хичээсэн. Эмэгтэй хүнд бүхнийг чадах хүч бий. “Үзэл бодлын хувьд эрэгтэй, эмэгтэй хүнийг ялгалгүй тэгш байгаасай” гэж би хүсдэг. Түүнчлэн, бага зэргийн хайр дурлалын талаар шигтгэж өгөхийг хичээсэн.

-Нууц биш цаашдын зорилгоосоо хуваалцаж болох уу. Хоёр дахь үзэсгэлэнгээрээ юуг илэрхийлэхийг зорьж байгаа вэ?

     -Би амьдралаа тэр бүр төлөвлөөд байдаггүй. Гэхдээ үхэхээсээ өмнө чанартай 10 бүтээл гаргахыг зорьж байгаа. Хоёр дахь үзэсгэлэнд маань нийгэмд чиглэсэн бүтээлүүд хийж байна. Нийгмийг хувь хүмүүс бүтээдэг. Тиймээс хувь хүн эхлээд боловсорч байж, нийгэм соён гэгээрч чадах юм болов уу. Том өөрчлөлтийг авчрахгүй байсан ч хүрээлэн байгаа орчноо засаж, өөрчилж чадна. “Хүн алдаагаа харж ухаардаг болохоор ухаарлыг нь өгөх сэдэл нь миний уран бүтээл байгаасай” гээд уран бүтээлээ туурвиж байна даа.

-Ярианыхаа төгсгөлд уншигчдад маань хэрхэн уран зургийг илүү ойлгодог болох талаар зөвлөгөө өгнө үү?

    -Уран зургийг нүдээрээ хараад өнгөрөх биш зүрх сэтгэл, тархиараа харах хэрэгтэй. Тэгсэн үед уран зургийн мөн чанарт нэвтэрч чадна. Уран зургийг илүү ойлгож суръя гэвэл юун түрүүнд галерей үздэг соёл дадалтай байх хэрэгтэй. Эцэст нь эрэл хайгуулч байх уран зургийг илүү ойлгоход тань туслах болно.

 -Ярилцлага өгсөнд баярлалаа.

   -Баярлалаа.