Олон улсын шилдэг гоо бүсгүйчүүд дунд зохион байгуулагдсан "Mrs Glam World 2022" тэмцээнээс Монгол Улсаа төлөөлөн оролцсон мисс М.Дашбалжид нэгдүгээр байрт шалгарсан билээ. Инээмсэглэл цацруулсан бүсгүй төрөөд нэг жил дотор гурван ч удаа загварын тайзнаа гарсан ажээ.

-Энэтхэг Улсад зохион байгуулагдсан "Mrs Glam World 2022" гоо бүсгүй шалгаруулах тэмцээнээс нэгдүгээр байр эзэлсэнд баяр хүргэе. Баярын сэтгэгдлээсээ хуваалцахгүй юу?

    -Амжилт гаргахын тулд их хичээсэн. Өрсөлдөгч бүсгүйчүүд үнэхээр хөөрхөн, авьяаслаг байсан учраас өөрийгөө шагналт байрт орно гэж төсөөлсөнгүй. Титэмээ зүүж байх үеийн мэдрэмжийг юугаар ч зүйрлэшгүй, нүдэнд нулимс цийлгэнэсэн мөч байлаа.

-Тэмцээн хэд хоног үргэлжилсэн бэ. Та хэдий хэр хугацаанд бэлдэв?

    -Тавдугаар сард тэмцээнд оролцох урилга ирсэн. Долдугаар сараас эхлээд тэмцээндээ бэлдэж эхэлсэн дээ. "Mrs Glam World 2022" тэмцээн нийт долоон хоног үргэлжиллээ.

-Шагнал авч байх үедээ юу бодсон бэ?

    -Би ганцаараа ирж тэмцээнд оролцож байгаа учраас “Шагнал авч байгаа энэ мөчид ээж минь хамт байсан бол  сайхан даа” гэж бодогддог юм билээ. Би хамгийн түрүүнд охиноо бодсон, анх удаа урт хугацаагаар хол байгаа учраас их санасан. Хэцүү санагдах бүрд “Ирээдүйд охин минь надаас үлгэр дуурайлал авна” гэж бодож, шантралгүй явлаа.

-Багаасаа  загвар өмсөгч, мисс болно гэж боддог байв уу?

    -Охид бүгд л өндөр өсгийт, сайхан даашинз өмсөх дуртай байдаг шүү дээ. Багадаа мисс болохыг хүсдэг байсан ч өсвөр насандаа спорт илүү сонирхолтой санагдаж хэсэг загвараа орхиж байсан. Ээж намайг загвараар явуулах их дуртай байсан учраас эргэн загварт татагдаж хэлсэн дээ.

-Дахин загварын тайзан дээр гарах ямар байна?

       -Төрөөд жил болсон байна. Төрсний дараах сэтгэл гутралтай яах аргагүй нүүр тулсан. Бүх зүйл өөрчлөгдөж, өөрийгөө голж эхэлдэг юм байна. Гэхдээ тэр үед өөрийгөө илүү их хайрлах хэрэгтэй юм билээ. Загварын тайзаа бага зэрэг санасан. Ийм үед хамгийн их түшиг тулгуур нь нөхөр юм байна. Төрснийхөө дараа таргалалтыг “detoxin” брэндийн бүтээгдэхүүнээр арилгасан. Таргалалтаас болоод хамгийн их бухимдал үүсэх гээд байдаг юм билээ. Энэ хугацаанд хоёр ч загварын шоунд амжилтай оролцсон байна. Төрсний дараа оролцсон анхны олон улсын тэмцээн байлаа. Бага зэрэг төсөөрсөн байна шүү.

-Таныг “Mongolian next top model” тэмцээний оролцогч гэдгээр  нь олон хүн танина шүү дээ. Тус тэмцээний талаар яривал?

    -Хамгийн нандин, сайхан дурсамжуудын нэг. Загварын агентлагт ороод нэг сар болоогүй байхдаа тус тэмцээнд оролцож байсан. Бүх зүйлс шинэ, дээрээс нь зорилгоо тодорхойлж чадаагүй юм гэж боддог.

-Хамгийн анх тайзан дээр алхаж байх үеийн дурсамжаас хуваалцахгүй юу?

    -"Гоёл" загварын шоунд оролцож байлаа. Тайзан дээр алхах үед намайг харж байгаа харц хамгийн их догдлох шалтгаан болдог.  Сайн загвар зохион бүтээгчийн хувцсыг өмсөөд тайзан дээр алхана гэдэг маш их хариуцлага бас аз завшаан.

-Тайзан дээр байх үедээ юунд анхаарал хандуулдаг вэ?    

    -Амьдралаас бүрэн тасарч зөвхөн тэр алхаанд анхаарлаа хандуулдаг. Миний өмссөн хувцасны загвар зохион бүтээгч юу бодож, хүсэж тэр хувцсыг урласныг биеэрээ мэдрэхийг хичээдэг. Анхаарлаа сарниулах  юм бол алдаа гаргаж магадгүй учраас анхаарлаа дээд цэгт нь хүртэл төвлөрүүлдэг.

-Загвар өмсөгч мэргэжлийг хялбархан гэж хардаг хүмүүс байдаг. Та энэ тал дээр ямар бодолтой байдаг вэ?

    -Гоё, сайхан харагдах тийм ч амархан биш, 2-3 минут тайзан дээр үзэсгэлэнтэй харагдахын тулд бүтэн жилийн бэлтгэл хийх тохиолдол байдаг. Хэдэн цаг ч хамаагүй өсгийтэй гуталтай алхдаг. Энэ мэргэжлээр суралцаж, ажилладаг охид илүү төлөвшсөн  байдаг. Хүнтэй зөв харьцах, өөртөө тохирсон хувцас өмсөж, нүүрээ будах гээд эмэгтэй хүнд хэрэгтэй олон чадварыг эзэмшдэг.

-Ярилцлага өгсөн танд баярлалаа.

    -Баярлалаа.