Монголчуудын нүүдэлчин ахуй, соёлтой салшгүй холбоотой амьтан бол банхар нохой. Уламжлалт мал аж ахуйг хамгаалагч, өрх гэрийн сахиус гэгддэг энэ үүлдрийн нохойг дэлхийн түвшинд таниулахын төлөө тууштай ажиллаж буй   “Мянган найз” ТББ-ын ерөнхий захирал Т.Түвшинтөртэй ярилцлаа.

-Юуны өмнө өөрийгөө манай уншигчдад танилцуулаач?

        -Намайг Түвшинтөр гэдэг. “Мянган найз” төрийн бус байгууллагын ерөнхий захирлаар ажилладаг. Манай байгууллага 2008 онд үүсгэн байгуулагдсан бөгөөд цэвэр үүлдрийн нохой үржүүлэг, гэрийн тэжээвэр амьтан, нохойны тоног хэрэгслийн худалдааны чиглэлээр үйл ажиллагаа явуулдаг.

-Амьтанд дурлах, тэжээж эхлэх болсон түүхээ хуваалцахгүй юу?

           -Манайх намайг бага байхаас олон төрлийн амьтан тэжээдэг айл байсан. Тийм орчинд өссөн минь амьтанд хайртай болоход нөлөөлсөн байх. Би 1986 оноос хойш нохой тэжээж эхэлсэн. Эхэндээ хобби байдлаар байсан бол цаашлаад гэр бүлээ авч явахын тулд энэ ажлыг тогтвортой болгох шаардлага гарсан. Ингээд 1998 оноос өөрийнхөө дуртай зүйлийг даган нохой үржүүлэг болон тэжээвэр амьтдын тоног хэрэгслийн худалдаагаар төрөлжсөнөөр өнөөдрийн хүрээнд үйл ажиллагаа явуулж байна.

-Монгол банхрын онцлог юунд оршдог вэ?

              -Монгол банхар бол бусад үүлдрийн нохойноос олон давуу талтай. Яг л хэд хэдэн үүлдрийн хамгийн сайн шинж чанарыг нэг дор багтаасан мэт ажлын өндөр чадвартай нохой. Биеийн анатоми, зан аашийн хувьд тэсвэртэй, амьдрах чадвар сайтай. Нүүдэлчин соёлын маань амьд гэрч болсон амьтан учир нүүдэл хийхэд зохицсон, анч, тэсвэртэй, сэрүүн хүйтэнд дассан, ачаалал даах чадвар өндөр байдаг.

 -“Хангарьд” нохой тань олон улсын уралдаанд амжилт үзүүлсэн байдаг. Энэ талаар сонирхуулна уу?

            -Хангарьд бол манай нэрийн хуудас болсон нохой. Монгол Улсын их аварга бөгөөд 2004 оноос хойшхи бүх үзэсгэлэн, тэмцээнд оролцож өнөөдрийг хүртэл манлайлж ирсэн. 2024 онд Харвардад зохион байгуулагдсан “Групп 11”-ийн аваргын болзол хангасан нь түүхэн амжилт байлаа. Энэ группт шинээр үүлдэр болж дэлхийн нохой судлалын төвд бүртгүүлэхээр зорьж буй нохдын уралдаан явагддаг. Тэр уралдаанд монгол банхар аварга болж, дэлхийн аваргаас шагнал хүртсэн нь манай нохойд төдийгүй Монголын нохой соёлд маш том ололт болсон. Өмнө нь бусад улсын нохой олон жилийн турш, олон уралдаан дамжиж байж ийм амжилтад хүрдэг байсан бол монгол банхар анхны оролцоогоороо аварга болсон нь бахархам үйл явдал болсон.

 -Цаашдын зорилгоо хуваалцахгүй юу?

              -Монгол банхрыг дэлхийн нохой судлалын төвд бүртгүүлэх нь миний хамгийн том зорилго. Мөн олон улсад сурталчилж, таниулахын төлөө тууштай ажиллана.

-Ярилцсанд баярлалаа.