Зорилгодоо хүрэхийн төлөө тууштай зүтгэсэн түүх бусдад урам зориг өгдөг. Тэрбээр 30 хоног ажлынхаа хажуугаар “UB Cab”-д taxi явж байр түрээсэлж тусдаа гарах зорилгодоо хүрчээ. Нэг сарын хугацаанд зорилгоо тодорхойлж, түүндээ хүрч чадсан С.Номинтой ярилцлаа.

-Ажлынхаа хажуугаар “30 хоног UB Cab-д яваад тусдаа гаръя” гэдэг challenge-ээ яагаад эхлүүлэх болсон бэ?

       -Сайн байна уу, намайг С.Номин гэдэг. Яг бусдын адил 9–18 цагийн хооронд ажилладаг жирийн нэгэн эмэгтэй. Ажилтай ч гэсэн авдаг цалин минь хүрэлцдэггүй. Татвар, шимтгэл, зээлээ төлөөд цалин дуусчихдаг учраас нэмэлт орлого олох шаардлага гарсан. Хамгийн эрсдэл багатай, цагт баригдахгүйгээр хийх боломжтой ажил гэж үзээд UB Cab-д жолоочоор бүртгүүлсэн. Цуглуулсан мөнгөөрөө байр түрээслэх зорилго тавьсан учраас өөрийгөө илүү дайчилж, өдөр бүрийн ажлаа бичлэг болгон цахим хуудсандаа оруулж эхэлсэн.

-Цахим сүлжээнд бичлэгээ оруулахад өдөрт хэдэн цагийг зарцуулдаг вэ?

         -Ажлаа тараад UB Cab-д явж байгаагаа бичлэг болгож авдаг. Гэртээ ирээд 2–3 цаг зарцуулж бичлэгээ эвлүүлээд, хоолой бичээд өглөө болгон нийтэлдэг байсан.

-Анх хэзээ машинаа авч байсан бэ?

      -18 настайдаа жолооны үнэмлэхээ аваад аав, ээжийнхээ машинаар хааяа нэг унадаг байсан. Харин өнгөрсөн жил өөрийнхөө машинаа авсан.

-Үйлчилгээний байгууллагад ажиллахад бэршээлтэй зүйл байв уу?

           -Миний харснаар үйлчлүүлэгчдийн ихэнх нь соёлтой байдаг. Арван хүн дундаас ес нь эелдэг. Хааяа нэг хүн харилцааны соёлгүй хүнтэй таардаг, зөв шаардлагаа тавиад ажлаа үргэлжлүүлдэг.

-Аливаа дадлыг бий болгоход тууштай байдал хэр чухал гэж боддог вэ?

           -Маш чухал. Зорилгодоо хүрэхийн тулд өдөр бүр жижиг дадлуудыг тогтмол хэрэгжүүлэх хэрэгтэй. Өмнө нь би тууштай байж чадалгүй олон боломжийг алдсан. Тиймээс дүү нартаа хэлэхэд, тууштай хандлага л хүнийг амжилтад хүргэдэг шүү.

-Эмэгтэй жолооч байх нь үйлчлүүлэгчдийн хандлагад нөлөөлдөг үү?

           -Миний хувьд үйлчлүүлэгчид ихэвчлэн найрсаг байдаг. Магадгүй эмэгтэй жолооч учраас зөөлөн өнгө аястай харьцдаг байх. Гэхдээ жолоочийн хүйсээс илүү үйлчилгээний чанар нь хамаардаг гэж боддог.

-Улаанбаатар хотын замын түгжрэл танд ямар бэрхшээл үүсгэдэг вэ?

          -Хотын түгжрэл үнэхээр хүндрэлтэй. Заримдаа зөвхөн зогсоолоосоо гарахад 20–30 минут зарцуулна. Зам засварын ажил их хийсэн ч явган болон дугуйн замд илүү анхаарах хэрэгтэй харагддаг. Орой үдэш явахад эсрэг талын машины хэт хурц гэрэл төвөгтэй. Жолооч бүр гэрлээ зөв оношлуулж, хариуцлагатай байгаасай гэж хүсдэг.

-30 хоногийн турш challenge хэрэгжүүлээд зорилгодоо хүрсэн үү?

Тийм ээ, үндсэн ажлаасаа цуглуулж байсан хадгаламж дээрээ 30 хоног Ubcab-д жолооч хийгээд олсон мөнгөөрөө 3+1 нөхцөлтэй байр түрээсэлж тусдаа гарч чадсаан. Challenge эхлүүлэх болсон нэг зорилго монголд залуучууд байр түрээслэхэд үнэхээр хүндрэлтэй, өндөр нөхцөлтэй учраас ядаж 3+1 төлбөрөө цуглуулъя гэж шийдээд энэхүү чалленжийг эхлүүлсэн. Анх эхлэхдээ өөртөө тууштай байх зорилго тавьж хийж эхэлсэн бичлэг олон хүнд хүрж илүү их хичээж шалтгаан болж байсан. Эдгээр 30 өдөр миний амьдралын нэгээхэн сайхан дурсамж болж үлдсэн. Бас жижиг зүйлд ч талархаж сурсан хүнийг амьдрал үргэлж шагнаж байдаг юм шиг санагддаг.

-Баярлалаа.