Дуурь бүжгийн эрдмийн театрын уран бүтээлчид БНСУ-ын уран бүтээлчидтэй хамтран Италийн нэрт хөгжмийн зохиолч Ж.Пуччинийгийн “Чио Чио Сан” дуурийг дахин тайзнаа өнөөдөр, маргааш хоёр дахин тавихаар болжээ. Тус дуурийн ерөнхий удирдаачаар Ц.Тэлмүүн-Очир ажиллаж байгаа юм байна. Бид түүнтэй ярилцлаа.

     Тэрбээр Хөгжим бүжгийн коллежид мэргэжлийн хийл хөгжимчинөөр сурч, СУИС-ыг хөгжмийн найруулагчаар төгссөн байдаг. Мөн  БНСУ-д хөгжмийн удирдаачаар сурч дүүргэсэн юм.

-Ж.Пуччинийгийн “Чио Чио Сан” дуурийг энэ удаад БНСУ-ын уран бүтээлчид хамтран тайзнаа тавьж байгаа юм байна. Энэ тоглолтын онцлог юу вэ?

          -Тийм ээ. Монгол Улс, БНСУ дипломат харилцаа тогтоосны 35 жилийн ойд зориулан УДБЭТ, БНСУ-ын уран бүтээлчид хамтран “Чио Чио Сан” дуурийг өнөөдөр, маргааш тоглож байна. Миний хувьд энэ тоглолт их онцлогтой. Би Солонгост сурч байсан учраас солонгос хүмүүсийг сайн мэднэ. Энэ удаагийн дуурьд Солонгосын найруулагчийн талаас сонирхолтой шийдлийг шингээснээрээ онцлог байгаа. Мөн Монгол талын найруулагчийн ур чадвар ч илрэх юм.

-Энэ дуурийг та хэддэх удаагаа удирдаж байгаа вэ?

        -Өнгөрсөн жил анх удаа энэхүү дуурь дээр ажилласан. Энэ удаагийн тавилт миний  гурав, дөрөв дэх удаагийн тоглолт болж байна.

-Та УДБЭТ-т 2023 оноос ерөнхий удирдаачаар ажиллаж байгаа. Энэ хугацаанд хэчнээн бүтээлд ажилласан бэ?

           -Тийм ээ. Би ДБЭТ-т 2012 онд ороод, 2019 он хүртэл  хийл хөгжимчнөөр ажиллаад, 2023 оноос хойш театрын ерөнхий удирдаачаар ажиллаж байна. Энэ хугацаанд Ж.Вердигийн  “Магбет”, “Атилла”, “Риголетто”, “Травиата”, “Турбадур”, “Аида”, Ж.Пуччинигийн “Чио Чио Сан”, “Богем”, Монгол дууриудаас Д.Нацагдоржийн “Ламбагуйн нулимс”, “Учиртай гурван толгой” зэрэг дуурь дээр ажилласан байна.

-“Чио Чио Сан” дуурийн онцлог нь юу вэ?

      -“Чио Чио сан” дуурь нь Япон болон Америкийн төрийн дуулал, Япон ардын дууг шингээж, эмэгтэй хүний сэтгэл хөдлөл, шаналал, баяр гунигийг хөгжмийн хэлээр маш гайхалтай илэрхийлсэн байдаг. Угаас          Ж.Пуччини бол дуурийн урлагийн оргил нь, Чио Чио Сан бол түүний сор бүтээл.

       -Энэ бүтээл улирлын сүүлчийн тоглолт уу. Өөр төлөвлөсөн тоглолт байгаа юу?

             -Энэ улирлыг бид Ж.Вердигийн “Магбет” дуурийн нэг тоглолт, И.И.Чайковскийн “Хунт нуур” тэргүүтэй тоглолтуудаар өндөрлөж, ирэх намар симфони найрал хөгжмөөр хөшгөө нээж, дуурийн тоглолтоо Монгол нэгэн уран бүтээлээр эхэлнэ.

-ДБЭТ сүүлийн жилүүдэд гадны театрын уран бүтээлчидтэй хамтарч бүтээл хийж бүтээлээ хүргэж байгаа нь ажиглагдаж байгаа. Дараагийн хамтрахаар төлөвлөсөн бүтээлийн хуваарь гарсан уу?

                -Тийм ээ. Бид гадаад харилцаа сайтай байгаа. Дараагийн уран бүтээлчидтэй хамтрах ажил одоогоор ярилцлагын шатандаа явж байна.

-“Чио Чио Сан” дуурийг үзэхээр ирж буй үзэгчдэдээ хандаж хэлэх зүйл бий байх аа?

           -Энэхүү бүтээлийг үзэх гэж төлөвлөж байгаа үзэгчдэдээ хандаж хэлэхэд, салфетикаа бэлдээд ирээрэй, үнэхээр гайхамшигтэй хөгжим, гайхамшигтай дуурь та бүхнийг хүлээж байгаа шүү. Хэзээ ч харамсахгүй гэдэгт итгэлтэй байна. Дуурийн урлаг гэдэг өөрөө дуулаачийн хамгийн дээд цэг, хөгжмийн хамгийн том бүтээл. Манайхны дунд дуурь, сонгодог урлаг гэхээр амьдралаас нэг их хол, дээд зэргийн зүйл гэх түгээмэл ойлголт байдаг. Гэтэл үнэндээ огтоос тийм биш. Театрт ирээд сонгодог урлагийг мэдрэнэ гэдэг энгийн амьдралаас гойд сайхан мэдрэмж байдаг. Зөвхөн дуурь ч гэлтгүй театрт тавигдаж байгаа уран бүтээлүүдийг  шимтэн үзэж тэр гайхалтай мэдрэмжийг аваасай гэж хүсэж байна.

-Ярилцсанд баярлалаа.

     -Баярлалаа.