“Miss World-Mongolia” тэмцээний үндэсний ялагчаар тодорч,  дэлхийн миссийн 72 дахь удаагийн тэмцээнд эх орноо төлөөлөн оролцож буй Б.Эрдэнэсувдтай ярилцлаа.

-Танд энэ өдрийн мэнд хүргэе. Тэмцээн нь амжилттай үргэлжилж байна уу, тэргүүн мисс тодруулах хүртэл хэр хугацаа үлдэж байна?

                -Дэлхийн мисс тодроход 11 хоног үлдлээ. Эх орноо төлөөлөн дэлхийн хэмжээний тэмцээнд оролцож байгаа учраас их хариуцлага үүрч байна. Энэ хариуцлагаа ухаарч Монгол Улсынхаа нэр хүндийг өндөрт өргөхийн тулд өөрт байгаа бүх л хүчээ дайчилж байгаа.

-Монгол Улсаа төлөөлөн тэмцээнд оролцох ямар байна. Эх орноо төлөөлж байгаа сэтгэгдлээсээ хуваалцахгүй юу?

                -Зарим хүмүүс монголчуудыг хөдөө хээр амьдардаг, хөгжөөгүй улс шиг боддог. Хоёр жилийн өмнө Германд амьдарч байхад гаднын найзууд “Танайх хичээл сургуульдаа мориор явдаг гэж үнэн үү” гэж их асуудаг байсан. Хөгжил, ёс заншлаасаа шалтгаалаад мориор сургуульдаа явдаг хүмүүс байгаа. Гэхдээ манай улс, нийслэл Улаанбаатар хот минь хөгжиж байгаа шүү гэдгийг харуулахыг зорьж байгаа. Эх орноо нүүр бардам төлөөлөхийн тулд өөрийгөө бүх л талаараа хөгжүүлээд энэ тэмцээнд оролцож байна.

-Дэлхийн миссийн тэмцээнд Монгол Улсынхаа юуг нь, ямар ёс заншлыг нь гайхуулж, сурталчлах зорилготой байгаа вэ?

                -Би танилцуулга бичлэг дээрээ дөрвөн улирлын онцлогийг харуулахыг хичээсэн. Нүүдэлчин аж, ахуйн сайхныг харуулахын сацуу их хотынхоо хөгжлийг харуулахыг хичээж байгаа.

- “Miss World-Mongolia” тэмцээний үндэсний ялагчаар шалгарч титмээ гардан авах үед ямар мэдрэмж төрсөн бэ. Баярлахын сацуу том үүрэг хариуцлагын эзэн болсон байх?

                -“Miss World-Mongolia” тэмцээний ялагч болчхоод эхлээд үнэхээр гайхсан. “Миний нэрийг дуудсан уу” гэж хэсэг бодож, зогссон. Багынхаа мөрөөдлийг биелүүлсэн учраас их баярласан. Гоо сайхны олимпод эх орноо төлөөлөх гэж байгаагаа ойлгоод сандарч, догдолсон. Гадаад гоо үзэмждээ анхаарахаас гадна хурд хүч, авьяас чадвар, сэтгэн бодох чадвартаа анхаарч, хөгжүүлсэн.

-Дэлхийн миссийн тэмцээнд үндэснийхээ хувцсыг өмсөөд алхчихсан шүү дээ. Дээлтэйгээ “Mongolia” хэмээн дуудуулаад алхах ямар байв?

                -Нээлтийн арга хэмжээний үеэр үндэснийхээ хувцсыг өмсөөд алхахдаа мэдэрсэн шиг сайхан мэдрэмжийг дахин мэдрэхгүй байх. Эх орныхоо нэрээр овоглоод тайзан дээр алхсан учраас эрч хүч мэдэрсэн. Нээлтийн бичлэгийг үзсэн хүмүүс “Яагаад инээгээгүй юм” гэж асуусан. Дараа нь дээл өмсөхөөр цаанаасаа эрхэмсэг, эрч хүчтэй болдог юм болов уу гэж бодсон.

-Хамгийн анх тайзан дээр алхаж байх үеийн дурсамжаас хуваалцахгүй юу?

                -14 настай охин “Swarovski” брэндийн шинэ загварын танилцуулга дээр алхаж байсан. Олон  тод гэрэлтэй, олон хүний харц туссан тайзан дээр үзүүлэх ёстой гоёлоо зүүгээд алхаж байхдаа “ Одоо яах ёстой билээ. Энэ гэрлүүдийн өөдөөс яаж харах билээ” гэж бодож, сандар ч байсан. Тэр үеийн дурсамж үргэлж сэтгэлд тод байдаг, хамгийн нандин дурсамжуудыг нэг.

-Тайзан дээр байх үедээ юунд анхаарал хандуулдаг вэ?

                -Алдаа гаргахгүй байхыг л хичээдэг дээ. Гэхдээ туршлагаасаа харахад “Би ямар харагдаж байгаа бол алдчих вий дээ” гэж бодож болохгүй юм билээ. Харин өөртөө итгэлтэй, эрч хүчтэй байвал тайзан дээр хамгийн сайхан харагддаг гэдгийг ойлгосон.

-Бөхийн удамтай шүү дээ, аав нь таныг барилдуулна гэдэг байв уу, бага насныхаа талаар ярихгүй юу?

                -Би багадаа их эршүүд хүүхэд байсан. Хөдөлгөөнтэй, жинтэй, бөхийн бэлтгэл дээр л өнждөг хүүхэд байлаа. Мөрөөдлийнхөө төлөө турж, өөрийнхөө төлөө хичээсэн учраас өнөөдөр эх орноо төлөөлөн тэмцээнд оролцоод явж байна. Аав минь намайг бөх, сагсчин болгох гэж их хичээсэн дээ. Гэхдээ дийлээгүй одоо гоо бүсгүйн тэмцээнд оролцож байгаа охиноо дэмжээд сууж байгаа.

-Дэлхийн миссийн тэмцээнд явж байгаа охиндоо аав, ээж нь юу захиж байна. Монголын тэргүүн мисс болоход нь хэрхэн хүлээж авсан бэ?

                -Орон орны хүмүүс цуглаж байгаа. Хүмүүстэй хүн гэдгээр нь харьцаарай, гадаад үзэмж, зан аашаар нь ялгаж харьцаарай. Тэр хүн юу ч туулж байгаа байж мэднэ, тиймээс хөөрхөн зантай, эелдэг, тус байгаарай, хүний нутагт биеэ бодоорой гэж ээж хэлсэн. Монголын тэргүүн мисс болохыг ээж минь дэмжсэн. Харин аав “Монгол Улсаа төлөөлж олон улсын тэмцээнд явах хүнд үүрэг, алдаа гаргах юм бол олон хэцүү зүйлийг туулна.  Аав нь охиныгоо хэцүү зүйл битгий үзээсэй гэж хүсэж байна” гээд жаахан эргэлзсэн. Би аавдаа мисс хүн ямар мэдлэг, боловсрол, чадвартай байдгийг харуулж, ойлгуулж чадсан.

-Таны дараагийн зорилго төлөвлөөгөө юу вэ. Оролцохыг хүссэн гоо бүсгүй шалгаруулах тэмцээн бий юү?

                -Багын мөрөөдөл байсан Дэлхийн миссийн тэмцээнд оролцож, тайзан дээр алхаж, Монгол Улсынхаа нэрийг дуудуулаад ирж байгаа нь миний нэг мөрөөдөл биелсэн хэрэг байгаа. Цаашид мэргэжил, ажилдаа илүү анхаарал хандуулна. Би улс төр судлал болон хууль, эрх зүйгээр сурдаг. Монгол Улсад тулгамдаж байгаа нийгмийн асуудлуудыг хэрхэн яаж, зөв шийдвэрлэх вэ, ямар зөв шийдвэр гаргах боломж байгаа вэ гэдгийг судалж, хуулийн хүрээнд шийдвэрлэнэ.  Мисс болсноороо дэлхий нийтэд хүний эрх, эрх чөлөөг дээшлүүлэхийн тулд хүмүүнлэгийн ажил хийх төлөвлөгөөтэй байгаа. Одоогийн байдлаар Архангай аймагт Үндэсний цэцэрлэгт хүрээлэн барих төслийг санаачлан ажиллаж байгаа. Цаашид нийтэд тустай хүмүүнлэгийн ажлыг идэвхтэйгээр хийхийг хүсэж байна. Тэр хүмүүнлэгийн ажлууд маань ирээдүй, хойч үеийнхэнд зориулсан байх болно. Дэлхийн мисс шалгаруулах тэмцээнд оролцсон учраас үүнээс том тэмцээн байхгүй гэж боддог учраас дахин гоо бүсгүй шалгаруулах тэмцээнд оролцохгүй ээ.

-Дэлхийн миссийн тэмцээд амжилттай оролцоход монголчууд танд ямар байдлаар тусалж чадах вэ?

                -Монголчуудын маань тусламж их хэрэгтэй. Youtube хуудас болон цахим сүлжээнд тавигдсан миний танилцуулга бичлэг, зураг, нийтлэлийн хандалтыг харж, бидэнд оноо өгдөг. Хандалтаас шалтгаалж тэмцээний эхний 40 байрыг шалгаруулдаг. Одоо ч монголчууд минь намайг үнэхээр сайн дэмжиж байгаа. Тэр дэмжлэг олон орны бүсгүйчүүд дунд өөртөө итгэлтэйгээр өрсөлдөх боломж олгож байгаад баяртай байгаа. Та бүхэн намайг илүү их дэмжээрэй, баярлалаа.