Одоогоос арван жилийн өмнө “Хамгийн сайхан нь” уран сайхны кино үзэгчдийн хүртээл болж байлаа. Тус кино нь “Монгол медиа” групп, “Очир” фильм студийн хамтарсан бүтээл бөгөөд гол дүрд жүжигчин А.Орхонтуул, “Опозит” хамтлагийн дуучин А.Гантулга нар тоглож байсан. Үзэгчдийн сэтгэлд хүрч, одоо ч сайн кино гэгддэг “Хамгийн сайхан нь” киноны хоёрдугаар анги энэ сарын 5-ны өдөр нээлтээ хийх гэж байна.

         Харин бид энэ удаагийн “Залуус” буландаа “Хамгийн сайхан нь” II уран сайхны киноны гол дүрийн жүжигчин Б.Ану-Үжинг урьж, ярилцлаа.  Тэрбээр Испани Улсад жүжигчний мэргэжил эзэмшсэн. Уншигч та бүхэн түүнийг “Хамгийн хөөрхөн охин” олон ангит киноны Азтайзаяагийн дүрээ нь андахгүй таних биз ээ.

-Сайн байна уу. Киногоо нээх гэж буйд баяр хүргэе. “Хамгийн сайхан нь-2” өмнөх ангиасаа юугаараа онцлог болсон бэ?

            -Сайн байна уу. Баярлалаа. “Хамгийн сайхан нь” гэхэд л мэдээж хүн бүрийн сэтгэлд шингэсэн кино дурсамж санаанд нь орж ирдэг нь тодорхой.  Харин “Хамгийн сайхан нь 2”-ын  хувьд 10 жилийн дараа цоо шинэ түүхээр эргэн ирж байгаагаараа онцлогтой юм. Миний хувьд кино маань маш энгийн харилцан яриа, дүрүүдээрээ онцлогтой гэж бодож байгаа.

-Дүрийнхээ талаар цухас ярьж өгөөч?

           -Би энэ удаа Нинжин гэх гол дүрийн охины дүрийг бүтээлээ. Нинжин өөрийгөө хэдийнээ олсон, үзэл бодолдоо үнэнч, биеэ даасан, зоригтой бөгөөд энгийн л нэг охины дүр байгаа.

-Зураг авалтын үеэр хөгжилтэй дурсамжаасаа хуваалцаач?

             -Хамт олон маань үнэхээр гоё хүмүүс явсан болохоор хөгжилтэй үедээ хөгжилтэй маш их хайр халамж дунд байсан. Энэ удаагийн киноны дүр маань намайг маш их сорьсон дүр байсан. Найруулагч маань намайг нөгөө л энгийн энхрий охины дүрээс тэс өөр байлгах талаас маш их ажилласан.

-Хүндрэлтэй зураг авалт байв уу. Кино зураг авалт хаана, хаана хийгдсэн бэ?

           -Айкшин хэсгүүд сэтгэл санааны хувьд гунигт автуулсан хэсгүүд хүндрэлтэй байсан гэхээс илүү амттай байсан гэж хэлж болох юм. Бид нар Дархан хот болон Хамрын хийдэд зураг авалтуудаа хийсэн. Ер нь бусад кинонуудад тийм ч их харагдаад байдаггүй газрууд манай кинонд гарна.

-Таны хүүхэд нас хаана, хэрхэн өнгөрсөн бэ?

                -Өвөө, эмээ дээрээ өссөндөө. Сургууль гэр хоёрын хооронд л 10 жилээ өнгөрөөсөн дөө. Гэрийнхэн хатуу байсан болохоор өдөр 14:30 цаг гэж тараад ойрхон болохоор 15:00 цаг гэхэд гэртээ ирчихсэн байр ёстой байдаг байсан. Нэг удаа 16:00 цаг өнгөрч байхад ирээд загнуулж байсан./ инээв/

-Испани улсын Барселона хотод жүжигчний мэргэжлээр суралцаж төгссөн шүү дээ. Яагаад гаднын орныг сонгож суралцав?

            -Ээж маань Испанид амьдардаг болохоор Барселона хотыг сонгосон. Ер нь ээж хаана байна тийшээ явах нь ойлгомжтой байсан.

-“Хамгийн хөөрхөн охин” олон ангит кинонд ажиллаж байсан шүү дээ. Олон ангит кинонд дүр бүтээх ямар байсан бэ. Тухайн үеийн дурсамжаасаа хуваалцаач?

             -Ер нь л "Хамгийн хөөрхөн охин" олон ангит кино маань яг миний сургуулиа төгсөөд тоглосон анхны кино. Өмнөх кинонууддаа сургуулийнхаа амралтаараа монголд ирж тоглож байсан болохоор туршлага бага байсан. Тиймдээ ч олон ангит бол үнэхээр чанга юм байна лээ. Гэхдээ тэр хэрээр их зүйл сурсан. Дүрийг маань одоо хүртэл хүмүүс маш их хайрлаж, нандигнаж сэтгэгдлээ одоог хүртэл явуулдагт баярладаг. Барселона дахь дипломоо авахдаа практикийн хэдэн сараа Хамгийн азтай үе киногоороо хааж байсан. Дүрийн нэр Азтайзаяа гэж дуудуулсаар байгаад аз дагуулаад байдаг юм шиг санагддаг болсон.

-Таны хувьд ихэвчлэн дурлалт бүсгүйд дүрд тоглосон харагддаг. Уран бүтээлчийн хувьд өөрийгөө эвдсэн дүр бүтээх бодол бий юү?

         -Сургуулиа төгсөөд дөнгөж хоёр жил болж байгаа болохоор мэдээж цаашдаа олон чанартай дүрд тоглоно. Тэр энэ гэж хэлэх эрт байна.

-Ярилцсанд баярлалаа.

                -Баярлалаа.