“Нэг хаалга-Нэг шинжилгээ” нэгдсэн арга хэмжээг хоёрдугаар сарын 11-23-ны хооронд зохион байгуулсан. Тус арга хэмжээг зохион байгуулахад голлох үүргийг гүйцэтгэж ажилласан эмнэлгийн удирдлагуудтай Эрүүл мэндийн сайд С.Энхболд цахимаар холбогдон эмч, албан хаагчдынхаа илүү цагийн нэмэгдлийг өнөөдөр шийдвэрлэсэн гэдгээ хэлэв.  

1900 гаруй эмч, эмнэлгийн албан хаагч 24 цагаар 12 хоногийн турш шинжилгээ авах ажилд дайчлагдаж 500 мянга гаруй шинжилгээ хийсэн

Тэрбээр “Монгол Улсын төр томоохон нэгдсэн үйл ажиллагааг зохион байгуулах өндөр чадамжтай гэдгийг харуулсан үйл явдал нь “Нэг хаалга-Нэг шинжилгээ” нэгдсэн арга хэмжээ боллоо. Энэ ажилд эрүүл мэндийн салбарынхан манлайлан оролцож, хамгийн чухал үүргийг гүйцэтгэж ажилласанд салбарын сайдын хувьд талархаж буйгаа идэрхийлье. 1900 гаруй эмч, эмнэлгийн албан хаагч 24 цагаар 12 хоногийн турш шинжилгээ авах ажилд дайчлагдаж 500 мянга гаруй шинжилгээ хийж, хариуг нь гарган ажилласан нь Монгол Улсад “Ковид-19”-ийн эсрэг вакцинжуулах ажлыг эхүүлэх үндсэн суурь болж чадлаа. Эрүүл мэндийн салбарын эмч, албан хаагч нар вакцинжуулалтад хамрагдаж байна. 12 хоногийн турш хичээж ажилласан Эрүүл мэндийн салбарын эмч, албан хаагчдынхаа илүү цагийн нэмэгдлийг өнөөдөр шийдвэрлэсэн гэдгээ хэлэхэд таатай байна” хэмээн ярилаа.