Эрүүл мэндийн яамнаас мэдээлэл хийх үеэр сэтгүүлчид асуулт асууж, хариулт авлаа.

-БГД-ийн IV  хороо болон БЗД-ийн 17  дугаар хорооны иргэдийн хөрш, орцны хүмүүс халдвар авсан гэлээ. Юугаар дамжиж халдвар авсан байх магадлалтай вэ. Агааржуулалт болон усны хоолойгоор халдвар тархсан байх магадлал бий юү?

-БГД-ийн IV  хорооны дөрвөн орон сууцнаас гэр бүлийн болон зэргэлдээ хаалга  дээд, доод давхрын хүн нь халдвар авсан тохиолдол илэрсэн. Хүнсний дэлгүүр болон СӨХ нь нэг учраас хавьтал болсон байх. Одоогоор агааржуулалт болон усны хоолойгоор халдвар тархсан гэдгийг баталгаажуулаагүй байна. Энэ нь амьсгал, агаар дуслаар дамждаг өвчлөл. БЗД-ийн  17  дугаар хорооны иргэд мөн хөрш, биенийхээрээ ордог байсан хүмүүс байжээ. 

-"Алтан жолоо"импексийн  нэг ажилтнаас халдвар илэрсэн гэсэн. Үүний голомт тогтоогдсон уу?

-Тус компанийн ажилтны гэр бүл өвчилсөн байсан учраас халдвар авсан байсан. Тиймээс тухайн иргэний ойрын болон дам хавьтлыг тусгаарлаж, шинжилгээ авч байна гэв.

Мөн энэ үеэр ЭМЯ-ны ахлах шинжээч Д.Нарангэрэл "Дэлхий дахинд агааржуулалтын хоолойгоор дамжиж халдвар тархаж байна гэсэн судалгаа бий. Тухайлбал, Сингапурын гадаад ажилчдын байранд агааржуулалтын хоолойгоор халдвар тархсан тохиолдол гарсан. Бид энэ талаар тандалт судалгаа хийж байгаа. Мөн иргэд лифтэнд аль болох суухгүй байх. Суувал хоёроос дээш хүн суухгүй, нүүр нүүр рүүгээ харахгүй, нуруугаа харуулан зогсох шаардлагатай" гэсэн юм.