ЭМЯ-наас коронавирусийн нөхцөл байдлын талаар мэдээлэл хийж байна. Нэгдүгээр сарын 12-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори, авто лаборатори, НЭМҮТ-ийн лаборатори, Дархан-Уул, Сэлэнгэ, Дорнод аймгийн салбар лабораторид 16975  хүнд PCR шинжилгээ хийхэд 13 хүнээс коронавирусийн халдвар илэрсэн байна. Энэ нь Улаанбаатар хотоос илэрсэн бөгөөд "Ачтан-Элит клиник" эмнэлгийн голомттой холбоотой нэг тохиолдол байна. 

Мөн БГД-ийн IV хорооны батлагдсан тохиолдлын гурван  гэр бүлийн долоон хүнээс халдвар илрээд байгаа аж. Түүнчлэн БЗД-ийн 17 дугаар хорооны батлагдсан тохиолдлын хөрш айлын нэг хүн  болон гэр бүлийн дөрвөн хүнээс халдвар илэрчээ. Ингэснээр Улаанбаатар хотод кластер өвчлөлийн голомтод батлагдсан тохиолдол 643 боллоо. Улсын хэмжээнд дотоодод илэрсэн тохиолдол 969  болж, Цэргийн төв эмнэлгээс 18, ХӨСҮТ-өөс 20 хүн эмчлэгдэж, дараагийн шатны эмнэлэг рүү шилжжээ. Нийт батлагдсан тохиолдол улсын хэмжээнд 1469 болсон гэдгийг ХӨСҮТ-ийн Тандалт, судалгааны албаны дарга А.Амбасэлмаа мэдээллээ.