Эрүүл мэндийн яамнаас мэдээлэл хийх үеэр сэтгүүлчдийн асуултад хариуллаа.

-"Сонгдо" эмнэлэгт шинэ голомт үүссэн гэсэн. Ойрын болон дам хавьтлуудын шинжилгээ хийгдэж дууссан уу?

-Энд нэг эмчээс халдвар илэрсэн. Батлагдсан тохиолдлын ойрын хавьтал байсан. Тиймээс нэгдүгээр сарын 9-нд батлагдсан тохиолдлын ойрын хавьтал байсан учраас тус эмнэлгийн бүх ажилчдыг тусгаарлах, шинжилгээ авах ажлыг зохион байгуулсан. 105 ажилтнаас шинжилгээ авч, эмчийн ойрын хавьтал 22 хүнийг тусгаарлаад хоёр дахь хавьтал 65 хүнийг гэрийн ажиглалтад шилжүүлсэн. Ингээд хавьтлуудын шинжилгээний хариу сөрөг гарсан учраас  эмнэлгийг хэвийн үйл ажиллагаа явуулж болно гээд явуулсан байгаа.

-БЗД-ийн 17 дугаар хорооны алба хаагч болон гэр бүлээс, "Хүннү Молл" худалдааны төвөөс халдвар илэрсэн гэсэн. Энэ талаар тодорхой мэдээлэл өгөөч?

-Тус дүүргийн 17 хорооны эмнэлгийн гудамжнаас хоёр хүн халдвар авсан. Тус гудамжны ойрын хавьтлыг тусгаарлаж, хоёр дахь хавьтлаас шинжилгээ авах ажлыг зохион байгуулж байгаа. "Хүннү Молл"-оос халдвар гараагүй.

-Гэрийн тэжээмэл амьтнаас халдвар илэрсэн тохиолдол бий юү. Тэжээмэл амьтдыг шинжилгээнд хамруулах боломжтой юу?

-Муур, нохойтойгоо тусгаарлагдана гэсэн тохиолдол гарсан. Тиймээс мал эмнэлэг, ариун цэврийн лабораторид хоёр муур, нэг нохой шинжлүүлсэн. Халдвар илрээгүй. Хавьтал болоогүй муур, нохойг шинжлээгүй.