ЭМЯ-наас коронавирусийн халдварын нөхцөл байдлын талаар мэдээлэл хийж байна. Нэгдүгээр сарын 10-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори, авто лаборатори, НЭМҮТ-ийн лаборатори, Дархан-Уул, Сэлэнгэ, Дорнод аймгийн салбар лабораторид 14216 хүнд PCR шинжилгээ хийхэд 13 хүнээс коронавирусийн халдвар илэрсэн байна. Эдгээр нь Улаанбаатар хотод илэрсэн бөгөөд өмнөх батлагдсан тохиолдлын ойрын хавьтлуудын давтан шинжилгээгээр илэрчээ. 

Тодруулбал, "Ачтан-Элит клиник" эмнэлэг, "Мөнххада", "Тэнүүн-Огоо" компанийн ойрын хавьтлууд байгаа аж. Улаанбаатар хотод батлагдсан тохиолдол 616 болсон бол аймгуудад сүүлийн өдрүүдэд халдвар илрээгүй байна. Улсын хэмжээнд батлагдсан тохиолдол 1442 болж, 896 нь эдгэрээд байгаа юм. Одоо 535 хүн эмчлүүлж байгаа бөгөөд маш хүнд гэх оноштой хоёр хүн байна гэдгийг ХӨСҮТ-ийн Тандалт, судалгааны албаны дарга А.Амбасэлмаа мэдээллээ.