ЭМЯ-наас коронавирусийн халдварын нөхцөл байдлын талаар мэдээлэл хийж байна. Нэгдүгээр сарын 9-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори, авто лаборатори, НЭМҮТ-ийн лаборатори, Дархан-Уул, Сэлэнгэ, Дорнод аймгийн салбар лабораторид 22993 хүнд PCR шинжилгээ хийхэд 21 хүнээс коронавирусийн халдвар илэрсэн байна. 

Үүний нэг нь Афганистан Улсаас ирсэн  энхийг сахиулагчаас илэрсэн байна. Үлдсэн 20 нь дотоодод илэрсэн кластер өвчлөл гэв. Тодруулбал, Баянгол дүүргийн 65, 12 дугаар байр, тусгаарлагдсан хүмүүсийн хоёр дахь давтан шинжилгээнээс найман хүнд илэрсэн байна. "Мөнххада" компанийн ажилтны ойрын хавьтал дөрөв байгаа аж. Улаанбаатар хотод батлагдсан тохиолдол 603 болсон бол аймаг орон нутагт шинээр халдвар илрээгүй  хэмээн ХӨСҮТ-ийн Тандалт, судалгааны албаны дарга А.Амбасэлмаа мэдээллээ.