ЭМЯ-наас коронавирусийн халдварын нөхцөл байдлын талаар 11:00 цагаас мэдээлэл хийлээ. Энэ талаар ХӨСҮТ-ийн Тандалт судалгааны албаны дарга А.АМБАСЭЛМАА “Өчигдрийн байдлаар нийт 5807 хүнд шинжилгээ хийхэд нийслэлд 21 хүнээс халдвар илэрлээ. Баянзүрх дүүргийн Нэгдсэн эмнэлэгт батлагдсан тохиолдлын ойрын хавьтал болох 19 хүний 2-3 дахь давтан шинжилгээгээр халдвар илэрсэн. Мөн гэр бүлийн хоёр хүнээс халдвар илрээд байна. Нийслэлд голомтлон бүртгэгдэж байгаа батлагдсан тохиолдол 450 боллоо. Сүүлийн 24 цагт бусад аймгуудад халдвар нэмж бүртгэгдээгүй бөгөөд 14 хүн эдгэрч, эмнэлгээс гарсан. Монгол Улсын хэмжээнд батлагдсан тохиолдол 1263 болсноос эдгэрсэн 869, эмчлэгдэж байгаа 384 хүн байна. Дээрх хүмүүсээс биеийн байдал хөнгөн 269, хүндэвтэр 104, хүнд ес, маш хүнд хоёр хүн байна. Баянзүрх дүүргийн дэгдэлттэй холбоотой гэр бүлийн хүмүүсээс дамжсан дам хавьтлын халдварын голомтууд үүсч байна. Нийслэлд бүртгэгдсэн халдварын том голомтуудаас 1-2 голомтын эх үүсвэрийг олж тогтоож чадаагүй. Баянзүрх дүүргийн эмнэлгийн хувьд халдварын маш том голомт гарсан. Хавьтлуудыг хянах 14 хоногийн хугацаа дуусаагүй ч 400 гаруй хавьтлыг гэрийн ажиглалтад шилжүүлсэн. Одоо 900 гаруй ойрын хавьтлыг тусгаарласан, Мөн хоёрдогч 2000 гаруй хавьтал бий” гэлээ.