Баянзүрх дүүргийн II хороонд байрлах 28/5 байрны оршин суугчаас халдвар илэрчээ. Тодруулбал, тус байрны нэгдүгээр орцонд оршин суух иргэнээс коронавирусийн халдвар илэрч, байрыг хамгаалалтад авч, орох, гарах хөдөлгөөнийг хязгаарлаад байна. Эх сурвалжийн мэдээлж буйгаар "4-5 хоногийн өмнөөс л сэжигтэй тохиолдол илэрсэн гээд иргэдэд мэдээлэл өгсөн. Гэхдээ яг аль орцноос илэрсэн, батлагдсан эсэх нь тодорхойгүй байсан. Харин өчигдрөөс 3-4 цагдаа ирж, иргэдийг байрнаас гаргахгүй нэг цаг орчим болсон. Ингэхдээ "Батлагдсан эсэх нь тодорхойгүй байна. Хэрэв халдвар батлагдаагүй бол хамгаалалт авахгүй" хэмээсэн. Тэгээд нэг цаг орчмын дараа хамгаалалт байхгүй болж, цагдаа нар явсны дараа ХӨСҮТ-ийн ариутгалын хүмүүс 2-3 машинтай ирж, халдваргүйжилт хийсэн. Ингэхэд мөн л халдвар батлагдсан эсэх нь тодорхойгүй байж байгаад өнөө өглөө буюу 09:00 цагийн үед  дахиад хамгаалалт авчихлаа. Одоогийн байдлаар манай байрны нэг хүнээс халдвар илэрсэн гэнэ. Тухайн иргэн нь гэртээ ганцаараа амьдардаг байсан бөгөөд одоогийн байдлаар ХӨСҮТ-д хэвтэн эмчлүүлж байгаа гэсэн. Өндөр настай, биеийн дархлаа муутай хүн гэж сонссон. Одоогоор нэгдүгээр орцонд хөл хорио тогтоож, цагдаагийн хамгаалалт аваад байна. Харин хоёрдугаар байрны оршин суугчид гэрээсээ орж, гарч болж байгаа. Мөн иргэдээс шинжилгээ авах ажил өрнөж байна. Өмнө нь өгсөн ч гэсэн гэрээс нь дахин шинжилгээ авч байгаа. Түүнчлэн иргэд байрны доод талд байрлах дэлгүүрийн худалдагч болон жижүүрийн тусламжтайгаар хүнсээ базааж байна. Иргэд орцны гадна талын үүднээс ирж, хүнсээ авч байгаа. Мөн нэгдүгээр орцны оршин суугчид хогоо үүдэнд гаргаж хаях ёстой бөгөөд ариутгаж, цааш нь тээвэрлэнэ гэсэн. Биднийг 14-21 хоногийн хугацаанд тусгаарлах юм шиг байна" гэх мэдээллийг өглөө. Мөн халдвар авсан иргэн нь хаанаас халдвар авсан нь тодорхоогүй байгаа бололтой. Тус байр нь "Home plaza-1" дэлгүүрийн хойд талд байрладаг.