Эрүүл мэндийн яамнаас коронавирусийн нөхцөл байдлын талаарх ээлжит мэдээллээ хийлээ. Өчигдөр буюу нэгдүгээр сарын 1-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори, авто лаборатори, НЭМҮТ-ийн лаборатори, Дархан-Уул, Сэлэнгэ аймгийн салбар лабораторид 11152 хүнд PCR шинжилгээ хийхэд  22 хүнээс коронавирусийн халдвар илэрчээ. Үүний долоо нь Улаанбаатар-Франкфурт чиглэлийн онгоцоор ирсэн иргэдийн гурав дахь давтан шинжилгээнээс илэрсэн байна. 

Тодруулбал, Амар зочид буудалд байсан хүний тав, Жаргалант зочид буудалд байсан хоёр хүний давтан шинжилгээгээр вирус илрээд байгаа аж. Амар зочид буудалд байсан резидент эмчээс вирус илэрсэн учраас 100 гаруй хүнийг нүүлгэн шилжүүлсэн байна.

Дотооддоо 15 тохиолдолд илэрсэн. Үүний дөрөв нь "Мөнх Хада" ХХК-ын голомт буюу тэдний хавьтал болсон хүмүүсээс илэрсэн бөгөөд тус голомтын өвчлөл нийт зургаан тохиолдол болжээ. Тус компанийн 35 хүнийг ойрын хавьтал гэж тусгаарласан бөгөөд голомтыг тогтоох ажил үргэлжилж байгаа аж. Мөн Төв шуудан компанийн гүний гаалийн хэсэгт ажилладаг хоёр ажилтнаас халдвар илрээд байгаа аж. Гэр бүлийн болон шуудангийн ажилчдыг тусгаарлаад байна. Үлдсэн нь өмнөх батлагдсан тохиолдлуудтай хавьтал болсон гэр бүлийн болон БЗД-ийн Нэгдсэн эмнэлгээс улбаатай дөрөв болон өргөн хүрээний шинжилгээний цэгүүд дээр гэр бүлээрээ халдварт өртсөн 3-4 тохиолдол байгаа талаар ХӨСҮТ-ийн Тандалт судалгааны хэлтсийн дарга А.Амбасэлмаа мэдээллээ. Ингэснээр улсын хэмжээнд дотоодод илэрсэн тохиолдол 755 болж, улсын хэмжээнд батлагдсан тохиолдол 1242 болжээ.