Эрүүл мэндийн яамнаас цаг үеийн асуудлаар ээлжит мэдээллээ хийлээ. ХӨСҮТ-ийн Тандалт судалгааны албаны дарга А.Амбасэлмаа "Арванхоёрдугаар сарын 28-нд нийт 14035 хүнд PCR шинжилгээ хийлээ.Эдгээрээс 38 хүнд коронавирусийн халдвар илэрсэн байна.

Эдгээр тохиолдлын 36 нь БЗД-ийн Нэгдсэн эмнэлгийн голомтын ойрын хавьтал байсан. Тодруулбал, сувилагч хоёр, үйлчлэгч нэг, сахиур дөрөв, өвчтөн зургаа, гэр бүлийн хавьтал 16, дам хавьтлын хоёр хүний шинжилгээний хариу эерэг гарчээ. БЗД-ийн Нэгдэн эмнэлгийн голомтод хавьтал болсон 682 хүний гурав дах давтан шинжилгээнээс 15 хүнээс коронавирус илрээд байна. Сүүлийн тохиолдол болох гэр бүлийн хамааралтай 10 хүний ойрын хавьтал 100 гаруй хүнд шинжилгээ хийхэд 17 хүнээс коронавирус илрээд байна. Ингэснээр БЗД-ийн Нэгдсэн эмнэлгийн голомтын тоо 226 боллоо. Үүнээс эрүүл мэндийн 22 ажилтан бий. 

ХӨСҮТ-ийн хавьтал болсон 126 хүнд хоёр дахь удаагийн давтан шинжилгээ хийсэн. Үүнээс дөрвөн хүнээс нэмж илэрсэн. Батлагдсан тохиолдол нь  гэр бүлийн гурван хүн, хамт ажилладаг нэг сувилагчаас нь халдвар илрээд байна. Өнөөдрийн илэрсэн 38 тохиолдлын хоёр нь Цэргийн төв эмнэлгийнх байсан. Мөн Франкфуртын онгоцоор ирсэн нэг иргэний давтан шинжилгээгээр халдвар илэрсэн" гэв.