Коронавирусийн халдвар авсан хүмүүсийн зарим нь эдгэсэн ч шинж тэмдэг нь дахин илэрч байсан нь уг вирусийн эсрэг вакциныг гарган авахад, өвчний голомтыг тогтооход бэрхшээл үүсгэж байсан билээ. Коронавирус яагаад ахин сэдэрч, удаан хугацаанд өвчилж буйг Эзэн хааны Лондонгийн Факультет болон Массачусетсийн эмнэлэг хамтран коронавирус туссан өвчтөнүүд дээр судалжээ.  Судалгаанд 18-49 насны 4000 гаруй өвчтөн хамрагдахад тэдний арван хувь нь урт хугацааны буюу дөрвөөс дээш долоо хоногт коронавирусийн шинж тэмдэг илэрч байсан аж. Түүнчлэн тэдний 4.5 хувь нь наймаас дээш долоо хоногт, гурван хувь нь 12 долоо хоногоос дээш хугацаанд өвчний шинж тэмдэг нь дахин илэрсээр байжээ.

Вирус дахин сэдэрсэн өвчтөнүүд ужиг ядаргаанд орсон, нойрны асуудалтай, холбогч эд болон булчингийн үрэвсэлтэй байсан нь тогтоогджээ

    Коронавирус нь зөвхөн уушгийг гэмтээх бус архаг ядаргаа, ой санамжаа алдах, хоол шингээх, хоол боловсруулах эрхтэнд асуудал үүсгэх, зүрхний хэм алдагдах, толгойн өвчин, цусны даралт тогтворгүйжих, үс унах гэх мэт олон дагавар шинж тэмдгийг хүний биед үүсгэж байгааг эрдэмтэд тогтоогоод буй. Коронавирусийн халдвар дахин илэрсэн хүмүүсийн анхдагч тохиолдол нь ноцтой байгаагүй бөгөөд хоёр долоо хоногт нөхөн сэргээгдэж байжээ. Ийнхүү вирус дахин сэдэрсэн өвчтөнүүд ужиг ядаргаанд орсон, нойрны асуудалтай, холбогч эд болон булчингийн үрэвсэлтэй байсан нь тогтоогджээ. Коронавирус хүний дархлаа, мэдрэлийн системд болон бусад эрхтэнд хэрхэн нөлөөлсөн байдлаас урт хугацаанд үргэлжлэх эсэх нь хамаарч байгаа аж.  

    Мөн Европын МДПИ судалгааны байгууллагаас гаргасан ижил төрлийн судалгаанд эхний үр дүнгээр коронавирусийн халдвар авсан хүмүүсийн 25 хувьд нь гурван сарын дараа коронавирусийн аль нэг шинж нь дахин илэрч байна гэжээ.

Эх сурвалж: Wall Street Journal