Эрүүл мэндийн яамны ээлжит 11:00 цагийн мэдээллийн үеэр ХӨСҮТ-ийн Тандалт, судалгааны албаны дарга А.Амбасэлмаа “2020 оны арваннэгдүгээр сарын 14-нд 814 хүнд шинжилгээ хийхэд хоёр хүний шинжилгээнд коронавирус илэрлээ. ХӨСҮТ-ийн хүлээн авах тасгаар ирсэн 28, тандалтын зорилгоор хийсэн 28 хүний шинжилгээнд коронавирус илрээгүй. Тээврийн жолоочийн ойрын хавьтлын хоёр хүний шинжилгээнд коронавирус илэрлээ. Тухайн голомтод батлагдсан тохиолдол ес боллоо. Манай улсад коронавирусийн батлагдсан тохиолдол 428 байна” гэлээ. 

Түүнчлэн "Дээрх батлагдсан тохиолдлоос 328 хүн нь эдгэрсэн. Нийт 310 хүний ажиглалт, тандалтын хугацаа дууссан. Нутаг буцсан таван хүн байна. Нийслэл хотод 11 цэгийг ажиллуулж,өчигдрийн байдлаар 909 хүн  өгч, 750 хүний шинжилгээний хариу сөрөг гарсан. Үлдсэн хүний шинжилгээний хариу 17.00 цагт гарна. Бүх хавьтлуудын гэр оронд ЗӨСҮТ-өөс ариутгал халдваргүйжүүлэлтийг хийсэн.  Одоо ХӨСҮТ-д 163 хүн ажиглалт тандалтад байгаа" хэмээн мэдээллээ.