"Энхсаран" сувилалд ажиглалтад байсан иргэдийг ХӨСҮТ-д тусгаарлаж эхэллээ

2020-11-10, 1227

Эрүүл мэндийн сайд Т.Мөнхсайхан, сайдын зөвлөх О.Чимэдсүрэн болон холбогдох албаныхан өнөөдөр буюу арваннэгдүгээр сарын 10-ны 18:00 цагаас ХӨСҮТ-д коронавирусын халдварын эсрэг авч буй хариу арга хэмжээ, эмнэлгийн тусламж үйлчилгээ болон цаг үеийн асуудлаар шуурхай хуралдлаа. Шуурхай хурлаар Эрүүл мэндийн сайд дараах асуудлыг шийдвэрлэлээ.

Үүнд,

-"Энхсаран" сувилалд ажиглалтад байсан хүмүүсийг ХӨСҮТ-д яаралтайгаар тусгаарлахаар боллоо. ХӨСҮТ-д орны бэлэн байдлыг бүрэн хангаж, өнөө шөнөдөө ХӨСҮТ-ийн тусгаарлалтад авч дуусах юм. Бүх орны нөөц, бэлтгэлийг бүрэн хангасан байна.

-Халдварын голомтод ажиллаж буй эмнэлгийн бүх ажилтан таван сая төгрөгийн нэг удаагийн урамшуулал авсан. Харин лаборантууд, жолооч нар, вируслогийн ажилчид нэмэлт урамшуулалд хамрагддаггүй байсныг нөхөн олгохоор болов.

-Эмнэлгийн нэг удаагийн хэрэгслээр бүрэн хангах нөөц байгаа учраас ХӨСҮТ-ийг хэрэгцээт бүх хэрэгслээр хангах,

-Илүү цагаар болон чартер нислэг тосч шөнө, өдөргүй ачаалалтай ажилласан удирдах ажилтнуудын илүү цагийн урамшууллыг олгох,

-Коронавирусын халдварын үед ажиллаж буй ХӨСҮТ-ийн бүх авто машины засвар үйлчилгээ, даатгал зэрэг холбогдох бүх зардлыг ЭМЯ-наас шийдэх,

-ХӨСҮТ-ийн Мэс заслын тасгийн тоног, төхөөрөмжийг сайжруулах, нэн шаардлагатай аппаратуудыг шийдвэрлэж өгөх,

-Эмзүйн албаны агуулах байрны асуудлыг шийдвэрлэх,

-Голомтод ажиллаж буй эмч, ажилчдын амрах байрны хэсгийг илүү тав тухтай, тохилог орчноор бүрдүүлэх төсвийг шийдэж өгөх,

-Коронавирусын халдвар авсан эмч, сувилагчийн ар гэрт сэтгэл санааны дэмжлэг үзүүлэх,

-ХӨСҮТ-ийн хоёр лифтийг шинэчлэх зэрэг асуудлыг нэн даруй шийдвэрлэхээр боллоо.

Түүнчлэн "Эрх саран" сувиллын газарт тусгаарлагдаж байсан иргэдийг ХӨСҮТ-д яаралтайгаар шилжүүлж буй шалтгааныг маргааш ЭМЯ-ны холбогдох албаныхан 11:00 цагаас албан ёсоор мэдээлнэ гэлээ.

"Энхсаран" сувилалд ажиглалтад байсан иргэдийг ХӨСҮТ-д тусгаарлаж эхэллээ

Шинэ мэдээ

Нийтлэлчид