Монгол Улсын эрүүл мэндийн салбарыг “Ковид-19”-ийн болзошгүй тархалт, эрсдэлд урьдчилан бэлтгэхэд дэмжлэг үзүүлэх зорилгоор “Рио Тинто” ХХК-ийн Монгол дахь салбар болон “Оюу толгой” ХХК -ийн зүгээс 602 мянган ам.доллар буюу 1.7 тэрбум төгрөгтэй дүйх буцалтгүй тусламж  олгохоор боллоо. 

Энэхүү тусламжаар НҮБ-ын Хүн амын сан Монгол Улсад “Оношилгоо, зайн тусламж үйлчилгээний хүртээмжийг нэмэгдүүлэх” төслийг 2021 оны эхний улиралд багтаан хэрэгжүүлнэ. Тодруулбал, БНХАУ-тай хиллэдэг аймгууд болох Дорноговь, Өмнөговь, мөн Улаанбаатар хотод PCR буюу Полимеразын гинжин урвалын дөрвөн лабораторийг Эрүүл мэндийн яамны дэмжлэгтэйгээр байгуулах юм. Түүнээс гадна эмчийн байнгын хяналтад байх шаардлагатай иргэдэд үзүүлэх эрүүл мэндийн үйлчилгээг тасалдуулахгүйн тулд.анхан шатны эрүүл мэндийн төвүүд дээр телемедицин буюу зайнаас тусламж үзүүлэх үйлчилгээг нэвтрүүлэхээр төлөвлөж байна. 

Аравдугаар сарын 1-нд болсон энэхүү төслийн нээлтийн үйл ажиллагаанд буцалтгүй тусламж үзүүлж буй болон хэрэгжүүлэгч байгууллагуудын төлөөлөл болох “Рио Тинто” ХХК-ийн Монгол дахь салбарын захирал Даниел Воралл, “Оюу Толгой” ХХК-ийн Гүйцэтгэх захирал Армандо Торрес, НҮБ-ын Монгол дахь суурин зохицуулагч Тапан Мишра, Монгол дахь НҮБ-ын Хүн амын сангийн Тэргүүн Каори Ишикава нар оролцлоо.

“Бүх цаг үед, нэн ялангуяа яг одоо дэлхий дахинаа нүүр тулаад буй цар тахлын үед эрүүл мэндийн үйлчилгээг тасралтгүй үргэлжлүүлэх нь нэн чухал юм” хэмээн Монгол дахь НҮБ-ын Хүн амын сангийн Тэргүүн Каори Ишикава нээлтийн үеэр онцоллоо. Мөн энэхүү төслийн хүрээнд нэвтрүүлэх телемедицин үйлчилгээний ачаар жирэмсэн эхчүүд, өндөр настнууд, хөгжлийн бэрхшээлтэй иргэд зэрэг эмчийн тогтмол хяналтад байх шаардлагатай иргэд хол зам туулахын оронд гэрээсээ, аль эсвэл анхан шатны эрүүл мэндийн төв дээрээс өөрт хэрэгтэй тусламж үйлчилгээг авах боломж нээгдэнэ гэдгийг тэрбээр өгүүлжээ. 

PCR лабораториудыг Эх хүүхдийн эрүүл мэндийн үндэсний төв, Яармаг дахь Нийслэлийн Эх, хүүхдийн эмнэлэг, Дорноговь аймгийн Замын-Үүд сумын нэгдсэн эмнэлэг, Өмнөговь аймгийн Бүсийн оношилгоо эмчилгээний төвүүдэд байгуулна. Эдгээр эмнэлгүүд PCR лабораторитой болсноор аймаг, сумын түвшинд, мөн Улаанбаатар хотод “Ковид-19” халдвар болон томуу, томуу төст бусад өвчин, антибиотикт тэсвэртэй сүрьеэ, бэлгийн замаар дамждаг халдварт өвчнүүд, мөн цоо шинэ болон дахин идэвхжиж буй халдварт өвчнүүдийг түргэн шуурхай оношлох хүчин чадал нэмэгдэх юм.