ХӨСҮТ-ийн Эрт сэрэмжлүүлэг, хариу арга хэмжээ авах нэгжийн дарга Н.Сувдмаагаас томуугийн эсрэг вакцинд хэрхэн хамрагдах боломжтой талаар тодрууллаа.
-Томуугийн эсрэг вакцинд хэзээ, хэн хамрагдах ёстой вэ?
-Томуу, томуу төст өвчний вирус идэвхжээгүй, хүн амын дунд тархаагүй үед улирлын томуугийн эсрэг вакцинд хамрагдах нь үр дүнтэй. Манай улс аравдугаар сарын 1-10 хүртэл томуугийн эсрэг вакцин хийнэ. Энэ хугацаанд  эрсдэлт бүлэгийнхэн хамрагдана. Зургаан сартайгаас есөн насныхан, жирэмсэн ээж, ахмад настан, амьсгалын замын эрхтэн тогтолцооны архаг өвчтэй хүн, олон нийттэй харьцдаг үйлчилгээний байгууллагын ажилтан дархлаажуулалтын вакцинд хамрагдана. Мөн иргэд эсрэг заалтгүй бол төлбөрөө төлж хамрагдах боломжтой юм. 
-Улирлын томуугийн эсрэг вакциныг хаана хийх вэ?
-Хоёроос есөн насны цэцэрлэг, сургуулийн хүүхэд тухайн цэцэрлэг, сургуулийн дархлаажуулалтын түр цэгт. Зургаан сартайгаас есөн насны цэцэрлэг, сургуульд хамрагдаагүй хүүхэд, дөрвөөс дээш сартай жирэмсэн эмэгтэйчүүд, 65 ба түүнээс дээш насны болон архаг өвчтэй хүн харьяа эрүүл мэндий төвийн дархлаажуулалтын кабинетад вакциныг хийнэ. 
-Вакцин хийлгэхийн тулд юуг анхаарах хэрэгтэй вэ?
-Эмчийн үзлэгт орох, сайтар унтаж амрах, дулаан хувцаслах, сүүлийн нэг сарын хугацаанд ямар нэгэн вакцинд хамрагдаагүй байх ёстой. Мөн вакцинд хамрагдсны дараа вакцин тарьсан хэсгийг хөндөхгүй, хүрэхгүй байх, хоёр хоног ус хүргэхгүй байх, боолт хийх, эм, тос түрхэх, хөхний сүү, бусад зүйлээр жин тавихгүй байх нь чухал юм. 
-Вакцины найрлагыг тухайн орон бүсийн онцлогт тохируулан үйлдвэрлэдэг үү. Эсвэл ижил төрлийн вакциныг бүх оронд илгээдэг юм уу?
-Жил бүр томуугийн вирусийн хэв шинж, хүйтэн сэрүүний улиралд хүн амын дунд томуугийн ямар төрлийн вирус өвчлөл их үүсэж буйг лабораторийн тандалтаар судалдаг. Тухайн тандалтын мэдээллийг судалгаа, шинжилгээний байгууллага болон ДЭМБ гаргаснаар  аль вирусийн эсрэг биетийг агуулсан вакцин үйлдвэрлэх хэрэгтэйг шийддэг. Манай улсын хувьд энэ удаад  Бид H1N1, H3N2, А,B хүрээний хэв шинжийг агуулсан вакцин захиалсан.