Ерөнхий боловсролын сургуулийн сурагчдад цагдаа, дотоодын цэргийн байгууллагын үйл ажиллагааг таниулах, дадлага сургуулилт хийх, байгаль орчноо хамгаалах, эх орноороо бахархах үзэл, хандлага, зөв дадал төлөвшүүлэх зорилготой “Би Сэргийлэгч-2026” өртөөчилсөн сургалт хоёр дахь жилдээ зохион байгуулагдаж байна.

   Сургалтын үеэр сурагчдад цахим орчинд үйлдэгдэх гэмт хэргээс урьдчилан сэргийлэх, хорт зуршил болон сэтгэцэд нөлөөт бодисын талаарх ойлголт, түүний хор уршиг, Монгол орны амьтны талаарх хууль тогтоомж, цэргийн зохион байгуулалт зэрэг нийт найман сэдвээр практикт суурилсан сургалт зохион байгуулж байгаа аж.

   Тус сургалт “Сүүж-Уул” сэргээн засах амралт, сувиллын газарт болж байгаа бөгөөд нийслэлийн ерөнхий боловсролын сургуулийн 370 сурагч, найман багш оролцож байна.

   “Би Сэргийлэгч-2026” сургалт нь хүүхэд, өсвөр үеийнхнийг гэмт хэрэг, зөрчил, хорт зуршлаас урьдчилан сэргийлэхийн зэрэгцээ эх оронч үзэл, иргэний хариуцлага, байгаль орчноо хайрлан хамгаалах зөв хандлагыг төлөвшүүлэхэд чиглэж буйгаараа онцлог юм.