Монгол Улс цар тахлаас урьдчилан сэргийлэх үүднээс бүх нийтийн бэлэн байдалд шилжин, 2019-2020 оны хичээлийг хоёрдугаар улирлаас эхлэн цахимаар хичээллэсэн бөгөөд бүтэн нэг жилийн хугацаанд хичээл сургуулийн үйл ажиллагаа теле болон цахим хэлбэрээр явагдаж байна.

Өнгөрсөн хугацаанд цахим хичээлийн чанар, сурлагад ахиц гарахгүй, үр дүн тааруу байна гэх гомдол эцэг, эхчүүд болон оюутан, сурагчдаас ирж байгаа аж. Иймд 2020-2021 оны хичээлийн жилийн хоёрдугаар улирлаас танхимын хичээлийг эхлүүлэх саналыг БШУЯ-аас УОК болон Засгийн газарт хүргүүлсэн байна.

Тодруулбал, ерөнхий боловсролын сургуулиудын хувьд 2020-2021 оны хичээлийн жилийн нэгдүгээр улирлын амралт хоёрдугаар сарын 1-нд дуусаж байгаа ч Цагаан сарын үеэр хатуу хөл хорио тогтоох зэргийг харгалзан үзэж, 2021 оны гуравдугаар сарын 1-нээс танхимын хичээлийг эхлүүлэх саналыг гаргаж байгаа аж. Ингэхдээ халдвар хамгааллын дэглэмийг өндөр сахиж хичээллүүлэхээр төлөвлөж байгаа юм байна.