Элсэлтийн Ерөнхий шалгалтын явцын талаар өнөөдөр мэдээлэл хийлээ.

     Энэ үеэр  Боловсролын үнэлгээний төвийн захирал Л.Ганбат “Их, дээд сургууль, коллежед элсэгчдээс авдаг ЭЕШ улс орон даяар өнөөдөр 10:00 цагаас албан ёсоор эхэллээ. Тус шалгалтыг 23,24,25,26-ны өдрүүдэд арван хичээлээр тус бүр зохион байгуулна. Энэ жил нийт 36253 шалгуулагч  ЭЕШ өгөхөөр бүртгүүлсэн. Үүнээс 29200 орчим нь энэ жил арванхоёрдугаар анги төгсөж байгаа шалгуулагчид. Үлдсэн 7000 гаруй нь өнгөрсөн онд арванхоёрдугаар ангийг төгссөн, дахин шалгалт өгч байгаа хүүхдүүд.

Харин нийт бүртгүүлэгчдийн статистикийг хичээл сонголтоор нь харвал шалгуулагчдын 80 орчим хувь нь математик, физик, англи хэл, нийгэм судлал гэсэн хичээл байгаа бол түүх, газарзүй, орос хэл зэрэг хичээлийн 10-20 орчим хувь нь сонгож өгсөн гэдэг статистик байгаа.

   Улсын хэмжээнд  Элсэлтийн ерөнхий шалгалтыг зохион байгуулах 49 шалгалтын байр бий. Шалгалтын зохион байгуулалтад улсын хэмжээнд 2800 багш, ажилтан, цэрэг, цагдаа зэрэг хүмүүс хамтран ажиллаж байгаа” гэв.