-ХҮҮХДҮҮДЭЭ УТАС, ЗУРАГТНААС ХОЛДУУДАХ ГЭЖ, ГЭР БҮЛЭЭРЭЭ ЦАГИЙГ ЗУГААТАЙ ӨНГӨРҮҮЛЭХ ГЭЖ МӨСӨН ГУЛГУУРЫН ТАЛБАЙГАА БҮТЭЭСЭН-

Эхнэртэйгээ хамт алхаж байхдаа харсан мөсөн гулгуураа хашаандаа сүндэрлүүх нууцхан хүсэл тээж, хоёр өвлийг үдсэн залууг Г.Бизьяа гэдэг. Тэрбээр Сонгинохайрхан дүүргийн 42 дугаар хорооны Хайрхан багийн IX гудамжны ... дугаар тоотод эхнэр, хүү, охины хамт амьдардаг, эгэл жирийн гэр бүлийн өрхийн тэргүүн. Том машин барьж, амьдралаа залгуулдаг тэрбээр өвлийн улиралд гэртээ байдаг гэнэ. Харин энэ өвөл тэдний хашаанд хоёр жил мөрөөдсөн мөрөөдөл нь сүндэрлэж, хүүхдүүд нь баяртай, гэргий нь жаргалтай байгаа тухай мэдээлэл цахим орчинд цацагдаад байгаа билээ. Тодруулбал, тэрбээр гэргий Д.Оюунцэцэгийн хамт хашаандаа мөсөн гулгуурын талбай “бүтээж” хүүхдүүддээ бэлэг барьсан явдал юм. Хариуцлагатай аав, халамжит хань, жаргалтай гэр бүл Г.Бизьяагийн хашааны мөсөн гулгуурын талбайгаас бэлтгэсэн сурвалжилгаа хүргэе.

ГУЛСУУРНААС МӨСӨН ГУЛГУУР БОЛСОН НЬ

Нэг л өглөө хөл хорио тогтоож, гэрээсээ ч гарах боломжгүй болсон тэр гэргийтэйгээ хамт 14 хоног хашаандаа их ажил амжуулжээ. Мөсөн гулсуур хийх гэж хашааныхаа цасыг хуу хамж, устай зуурж эхэлсэн гэнэ. Харин хоёр хоног “ноцолдож”, гулсуурын хэвэнд орохгүй болохоор нь мөсөн гулгуурын талбай болгохоор зүтгэсэн байна. Ингэхдээ бүүр өвлийн өвгөн, цасан хүн, гацуур мод, гэрэл, хуучин, шинэ он бүтээж, гулгуурын талбайгаа “амь”-тай болгожээ. 4х8 метрийн хэмжээтэй дөрвөлжин талбайдаа хийгээгүй юм ховор. Ундааны савны бөглөөг өнгө өнгөөр нь алаглуулж, талбайгаа чимсэн байна. Гараа өргөөд, гангарч зогссон цасан хүн хүртэл урлажээ. Тэрбээр энэ талаараа “Мөсөн гулгуур анх харчихаад “Хашаандаа хийвэл болох юм байна” гэж эхнэртэйгээ ярьж байлаа. Нөхцөл байдал нь бүрдэхгүй явсаар энэ жил бодож байсан гулсуураа биш ч, мөсөн гулгуурын талбай бүтээлээ. Хөл хорионд удаан байхаар хүүхдүүд зурагт, утаснаас ер холдохгүй юм. Тэгээд тоглох талбай ч үгүй, гэрээсээ гарах боломжгүй хүүхдүүдээ байнга “Боль” гээд загнаад байх хэцүү. Тэгээд “Яавал хүүхдүүдээ цагийг зугаатай өнгөрүүлж болох вэ” гэх бодолд хөтлөгдөж, 14 хоног өглөө ажилдаа явж байгаа юм шиг босоод энэ талбайгаа бүтээлээ. Санасныг бодоход хэцүү байсан ч хүүхдүүд минь жаргалтай байгааг харах сайхан байна” хэмээн ярилаа.  

Б.МАРГАД-ЭРДЭНЭ: Найзуудаа аав, ээжээрээ мөсөн талбай хийлгээрэй, гоё юм байна шүү

Мөсөн гулгуурын талбайн “жинхэнэ” эздийг Б.Маргад-Эрдэнэ, Б.Амин-Эрдэнэ гэдэг. Тэд долоо, таван настай хүү, охин хоёр. Хашаандаа гулгах талбайтай болсноос хойш гар утас оролдохоо больсон гэнэ. Энэ талаар хоёрдугаар ангийн сурагч Б.Маргад-Эрдэнэ хүү “Найзуудаа аав, ээжээрээ мөсөн талбай хийлгээрэй, гоё юм байна шүү. Дүү бид хоёрт ээж талбай дээр гулгах цагийн хуваарь гаргаж өгсөн. Өдрийн 13:00-15:00 цагийн хооронд гулгах эрхтэй. Миний дүү жаахан учраас хурдан гэртээ орохгүй бол даарна. Харин би том болчихсон болохоор заримдаа цагаа жаахан сунгаж тоглодог юм. Манай хашааны найзууд, хажуу айлын хүүхдүүд бидний талбай дээр гулгахыг их хүсдэг. Аав заримдаа “Хөл хорио тогтоож, өвчин гарсан учраас хүүхдүүд хашаандаа цуглуулж болохгүй” гэдэг. Гэхдээ хааяа манай найзууд ирж тоглодог” гэлээ.

Г.Бизьяа таван мянган төгрөгөөр хашаандаа мөсөн гулгуурын талбайтай болжээ. Өөрөөр хэлбэл, таван тонн ус л худалдаж авсан байна. Тэрбээр энэ талаар “Уснаас өөрөөр мөнгө зарлагдаж, худалдаж авсан манай талбайд байхгүй. Өмнө нь шинэ жилээр хэрэглэж байсан гэрэл, гацуур, саагаа ашигласан. Харин зарим хүн бидний талбайг харчихаад “Ус, цахилгаан үнэгүй болсон гэдэг шиг ашигласан байна” гэж сошиалд бичсэн байна лээ. Гэхдээ бид усны үнэ цэнийг мэддэг учраас аль болох бага усаар талбайтай болъё гээд хашааныхаа цасыг ашигласан. Тэгээд ч усны мөнгөө төлөөд хүүхдүүдийнхээ тоглох талбайг бүтээсэн юм шүү. Уг нь талбайдаа гэрэлтүүлэг тавьж, орой хүүхдүүдээ жаахан тоглуулна гээд төлөвлөсөн байсан. Гэтэл хүмүүс “Үнэгүй юманд нугасгүй” гээд байсан учраас больчихсон. Тэр бүүхэл модон жорлонгийн үүдэнд байдаг асдаг гэрлээ хүртэл салгачихсан байгаа. Бид хүүхдүүдээ л жаргалтай байлгах гэж энэ бүхнийг хийсэн гэдгийг хүмүүст хэлмээр байна” гэсэн юм.

УНДААНЫ БӨГЛӨӨГӨӨР УРЛАГЧ

Түүний гэргий Д.Оюунцэцэг ундааны савны бөглөөгөөр янз бүрийн зүйл урладаг юм байна. Хогийн сав хүртэл хийжээ. Мөн модон жорлонгийнхоо хаалга, мод, нүүрснийхээ амбаарыг хүртэл бөглөөгөөр гоёсон байна. Тэрбээр “Гарын доорх материалыг ашиглаад гоёх дуртай. Хүүхдүүддээ зориулсан талбайдаа өөрийнхөө цуглуулсан 500 гаруй бөглөөг ашигласан. Бид нэгнийгээ дэмжээд хамт энэ бүгдийг хийлээ. Хэдийгээр талбай минь зай багатай ч хүүхдүүд минь жаргалтай байгаа нь сайхан байна” хэмээлээ.

Хөл хориог жаргалтай гэгч нь “эдэлж”, үр хүүхдээ жаргалтай байгааг харж суугаа Г.Бизьяагийн гэрээс гарахад хэдийнэ харуй бүрий болжээ. Өнгө өнгийн гэрэл анивчиж, хүү, охин хоёр нь хашаандаа үеийн найзуудтай тэшүүрээр гулгаж, чаргаар наадаж, хоккей тоглоод хачин жаргалтай байлаа.