Хүнсний дэлгүүр, супер маркет, захууд өдөр ирэх тусам үйлчлүүлэгчдийн хөлд дарагдаж, хаа сайгүй кассанд дугаарласан өргөн олон. Юун хөл хорио, юун хүн хоорондын хоёр метрийн зай барих

        Бүх нийтийн бэлэн байдлын зэрэгт шилжсэнээс хойших найм дахь өдөр нь өнөөдөр. Гэвч Улаанбаатар хотод лав иргэдийн хөлийг хатуу хориод, хүн, машины хөдөлгөөнийг тас хорьсон юм үнэндээ алга. Харин ч бүр 07:00-10:00, 17:00-20:00 цагт л иргэд нийтийн тээвэр, үйлчилгээний төвүүдээр үйлчлүүлэх боломжтой гэсэн Хотын даргын хэдэн удаа эргэж буцсан шийдвэрийн дагуу дээрх цагуудад хаа сайгүй иргэд хашуулсан юм шиг л бөөгнөрч байна. Хүнсний дэлгүүр, супер маркет, захууд өдөр ирэх тусам үйлчлүүлэгчдийн хөлд дарагдаж, хаа сайгүй кассанд дугаарласан өргөн олон. Юун хөл хорио, юун хүн хоорондын хоёр метрийн зай барих. Авсан бараагаа дааж ядан хөлсөө дуслуулж, бухимдсан иргэд хаа сайгүй "хашигдаж" байна. Тэдний дунд нэг л коронавирустай хүн орвол Улаанбаатар тэр чигээрээ аюулд орохоор үзэгдэл Хотын захиргаанаас тогтоосон дээрх цагуудад л үүсч байгааг анзаарах сөхөөтэй дарга, удирдлага алга. Ядаж, дүүрэг дүүргээр нь хуваарилалт хийгээд, тэр дүүргийн худалдааны зах, үйлчилгээний төв төдөн цагт, энэ дүүргийн эдэн цагт үйл ажиллагаа явуулна гээд зохистой менежмент хийчих хүн алга бололтой. Ийм байхад олон нийтийн үйлчилгээний төвүүдээр үйлчлүүлж буй хүмүүсийг бүртгэлжүүлэх, халууныг нь орж, гарахад нь үзэх эсэх тухай дурсах ч боломж алга.

      Дээр нь зуслангийн бүсүүд рүү гаргахгүй, хотынхоо төвд хашсан зохион байгуулалт бүхий нийслэлийн зам жирийн үе шиг байнга түгжирч, хаа сайгүй хүмүүс холхин, автобусны буудлууд нийтийн тээвэр хүлээсэн зорчигчдоор дүүрэн байна. Автобуснууд ч энэ хэрээр пиг зорчигчтой явж, иргэд ч тэр хэрээр шахцалдсаар. Юун нөгөө зорчигч суудал алгасч суух, нийтийн тээвэр дотор хоорондын зай барих дэг журам гэх мэт мөн л дээрхтэй адил хариуцлага, менежмент сох дутагдаж байна.

       Өөрөөр хэлбэл, Хотын дарга аа, иргэддээ хатуу хөл хорио тогтоож байгаа бол тогтоосон шиг тогтоо. Энэ журам, захирамжийг хэрэгжүүлж байгаа албатууд чинь ч ажлаа хийвэл хийсэн шиг хиймээр байна. Өөх ч биш, булчирхай ч биш ингэж явсаар коронавирусээ хяналтаасаа алдчихвал бүр ч нэрмээс болохоор байна. Өмнөх өдрүүдэд хэвлэлээр хангалттай балбуулсан эргэж буцсан, инээдтэй, эмгэнэлтэй шийдвэрүүдийн чинь хөгтэй, хортой явдлуудыг энэ удаад дурдахгүй өнгөрүүлье.

Тэдний дунд нэг л коронавирустай хүн орвол Улаанбаатар тэр чигээрээ аюулд орохоор үзэгдэл Хотын захиргаанаас тогтоосон дээрх цагуудад л үүсч байгааг анзаарах сөхөөтэй дарга, удирдлага алга

      Гол нь бүх нийтийн хөл хорионы улмаас үйл ажиллагаагаа арванхоёрдугаар сарын 1 хүртэл зогсоосон, эдийн засгийн хямралд орсон, шууд уналтад орж буй олон аж ахуйн нэгж, байгууллага, хувиараа бизнес эрхлэгчид цар тахлыг олон нийтийн дунд тархаалгүй “барих”-ыг чинь дуулгавартай хүлээж байна. Гэтэл ердөө л Хотын удирдлагуудын зөв зохион байгуулалт, журам, дүрмийг чанд мөрдүүлж чадахгүй байгаагаас болж “Ковид”-19 хяналтаас гарвал хэн хариуцлагыг нь хүлээх вэ.

        Хөл хорионы үед идэх хүнс, хэрэглээний зүйлсээ дарга нарын заасан цагт амжиж авах гэж бум олноороо бужигналдсан иргэд хохирох уу, ядаж хот доторх хорио цээрийн дэглэмээ зөв зохион байгуулж чадаагүй Хотын дарга та болон таны албатууд хариуцлага хүлээх үү.