Олон улсын хүүхдийн Найрамдал зусланд амрахаар очсон хүүхдүүд хоолны хордлогод орсон талаар эх сурвалж мэдээллээ. Улмаар хоолны хордлого гарсан талаар тус байгууллагаас нууцалж, 30 орчим хүүхдийг эмчилж байгаа гэдгийг эх сурвалж мэдээллээ.

     Олон улсын хүүхдийн найрамдал зуслан ээлжийн захиалгаар хүүхдүүдийг амрааж байгаа бөгөөд одоогоор Орчлон сургуулийн ахлах ангийн хүүхдүүд амарч байгаа юм байна. Хүүхдүүд хоолны хордлогод орсон талаар бид Найрамдал зуслангийн захиргаа хариуцсан мэргэжилтэнтэй холбогдож тодруулахад “Хүүхдүүд хоолны хордлогод орсон талаар бид мэдээгүй. Одоо дөнгөж ажлын цаг эхлээд явж байна. Энэ талаар тодорхой мэдээлэл хараахан аваагүй байна. Манай зусланд байнгын эмч ажиллахаас гадна зусланд хүүхдүүд нэмэгдэж ирсэнтэй холбоотой ЭХЭМҮТ-өөс хоёр эмч нэмэлтээр ажиллаж байгаа. Хэрвээ хүүхдийн биеийн байдал хүндэрсэн бол эмчийн хяналтан дор шат шатны эмнэлгүүдэд хүргэх байдлаар ажилладаг” гэх тайлбар өглөө.

    Харин “Орчлон” сургуулийн үйл ажиллагаа хариуцсан мэргэжилтэнтэй холбогдож тодруулахад “Найрамдал зусланд манай сургуулийн ахлах ангийн сурагчид амарч байгаа нь үнэн. Хоолны хордлого гарсан талаар бид мэдээлэл өгөх боломжгүй. Манай сургуулийн эмч мөн зуслан дээр ажиллаж байгаа” гэх мэдээлэл өглөө.