УИХ-ын ээлжит бус чуулганы нэгдсэн хуралдаан үргэлжилж байна. Энэ үеэр УИХ-ын гишүүн Б.Жаргалан үг хэллээ.

       Тэрбээр “Анхдугаар чуулган хуралдахад олон гэгээлэг зүйлс ярьсан. Гэтэл харамсалтай нь ээлжит чуулган эхлээгүй байхад ээлжит бус хурал дээр зарчимгүй асуудал хийгээд эхэллээ. Баасан гарагт санал хураасан байсан. Хууль санаачлагч буюу Засгийн газарт буцаах тухай санал хураалт үргэлжилж, 57/51 харьцаатайгаар УИХ шийдвэрээ гаргасан. Араас нь аль нэг бүлэг завсарлага аваад, горимын санал гэх зүйлээр УИХ-ын санал хураалтыг хүчингүй болгодог жишгийг цаашид тогтоож болохгүй. Ээлжит бус чуулган засварласны дараа дахиж төхөөрөмжийн алдаа гэх зүйл гаргахгүй байгаасай гэж УИХ-ын даргаас хүсэж байна. Өнгөрсөн парламент зургадугаар сард төсвийн гүйцэтгэлээ хэлэлцэх байтал тухайн үеийн парламент сонгуульдаад хэлэлцэж амжаагүй. Өнөөдөр Дэгийн тухай хуульд өөрчлөлт оруулж, төсвийн гүйцэтгэлийг хэлэлцэх гэж байна. Гэтэл материал нь өнөөдөр  өглөө ирсэн. Бүтэн жилийн төсвийн гүйцэтгэлтэй яаж ганцхан өдрийн дотор танилцаад, хэлэлцэх юм бэ. Төсвийн гүйцэтгэлийн асуудлыг цаг хугацаатай, гишүүдийг материалтай танилцсаны дараа хиймээр байна. Татварын тухай хуулийг хөнгөн хуумгай шийдэж болохгүй” гэв.