"Ногоон автобус" худалдан авах ажиллагаатай холбоотой А.Ганхуяг, Ж.Сүхбаатар нарын 24 хүнд холбогдох хэргийн шүүх хурал болж байна. Тэгвэл “Ногоон автобус”-ны гэх хэргийг прокуророос “Нийслэлийн Засаг даргын Тамгын газар болон Худалдан авах ажиллагааны газрын эрх бүхий албан тушаалтнууд 2023 онд нийслэлийн өмчийн хөрөнгөөр 600 ширхэг автобус худалдан авах ажиллагааг зохион байгуулахдаа хууль зөрчиж, бусдад давуу байдал бий болгосон” гэх уг “Ногоон автобус”-ны хэрэгт шалгагдаж буй Түгжрэлийг бууруулах үндэсний хорооны дарга, Монгол Улсын сайд асан Ж.Сүхбаатар хэвлэлд мэдээлэл өглөө.

Тэрбээр “ТББ-уудын зүгээс тавьсан шаардлагуудад зарим үзүүлэлт хүрэхгүй байсныг нийтийн тээврийн удирдлагууд танилцуулахад “Хүлээгээд авчих” гэсэн юм шиг буруутгаж байна. Намайг анх өнгөрсөн оны наймдугаар сарын 14-нд 20 автобус хүлээж авахад оролцоод, нөлөөлсөн юм шиг буруутгасан. Хэрэв үнэхээр тийм байсан бол юу гэж тэр автобуснуудыг олон нийтэд танилцуулах вэ дээ. Гэтэл нотлох баримт ч байхгүй тийм үндэслэлээр намайг буруутгаад би олон сарын турш шалгагдаад явж байна шүү дээ. Намайг автобусны хэргийн буруутан болгох ажиллагааг цахим сүлжээгээр олон хүн зохион байгуулалттай явуулж байна. Гэхдээ надад айж ичээд байх зүйл үгүй. Би Монгол Улсын сайдаар ажиллаж байсан хүнийхээ хувьд ёс зүйн хариуцлага хүлээж, албан тушаалаасаа чөлөөлөгдсөн. Харин манайхан нөгөө “Туг тахина” гэдэг шигээ нэг буруутанг хайгаад явахад хамгийн том дарга нь би болж таарсан юм шиг байна.

         Өнгөрсөн хугацаанд бүх мөрдөн шалгах ажиллагаа, мэдүүлэг, байцаалын ажил явагдаж дууссан. Үнэндээ би ийм үйлдэл хийгээгүй учраас үүнийг чинь нотлох боломжгүй шүү дээ. Миний хувьд хэргийн үнэн, бурууг хурдан шалгуулж, тогтоолгомоор байгаа ч 20 гаруй холбогдогч, олон өмгөөлөгч оролцож байгаа хэрэг болохоор удааширч байна. Түүнээс бус миний хувьд шүүх хуралдааныг хойшлуулаад байх сонирхол алга” гэв.