Нийслэлийн Хан-Уул дүүргийн 12 дугаар хорооны Сонгинын IV хэсгийн орчимд Туул гол үерлэсний улмаас голын эрэг нурж, айл өрхүүд рүү үерийн ус орох эрсдэлтэй нөхцөл байдал үүсжээ. Тухайлбал, онцгой байдлын байгууллагууд ирсэн энэ төрлийн дуудлагын дагуу Нийслэлийн Онцгой байдлын газар, Аврах анги, Сонгинохайрхан дүүргийн Онцгой байдлын хэлтэс, Хан-Уул дүүргийн Онцгой байдлын хэлтсийн алба хаагчид, Цагдаагийн байгууллага,  “УБЦТС” ТӨХК-ийн Баруун түгээх төв, дүүргийн Засаг даргын Тамгын газар, Тохижилт үйлчилгээний хэлтсийн ажилтнууд голын эрэг дагуу 20 автомашин хайрга, дайрга буулгаж 180 метр хамгаалалтын далан байгуулж, усанд автсан цахилгаан дамжуулах агаарын шугамын гурван тулгуур багана буулгаж, гурван өрхийн долоон иргэнийг аюулгүй газарт нүүлгэн шилжүүлжээ.

Түүнчлэн Сонгинын 29 дүгээр гудамжинд гэр усанд автсан гэсэн дуудлагыг өчигдөр буюу долдугаар сарын 28-ны өдрийн 15:50 цагт хүлээн авч, тус дүүргийн Онцгой байдлын хэлтсийн Гал түймэр унтраах, аврах 65 дугаар ангийн алба хаагчид 13 км замыг туулан очиход иргэн Ү-ийн таван ханатай гэр усанд автсан байсныг аюулгүй газарт нүүлгэн шилжүүлж ажилласан байна.