Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ойн Үндэсний их баяр наадмын бөхийн барилдаан үргэлжилж байна.

       Өвөрхангай аймгийн Баян-Өндөр сумын харьяат улсын начин Т.Довчинсэмбээг нутаг усныхан нь гэлтгүй бөхөд хайртай монгол түмэн “Том цолтнуудын ангууч” гэж хочилдог. Улсын начин Т.Довчинсэмбээ цар тахлын үед буюу 2021 онд гурван тэгш ойд зориулсан 512 бөхийн барилдаанд долоо давсан байдаг. Тухайн үед үзэгч олон “Т.Довчинсэмбээ улсын зааны батламжаа өвөртлөөд явлаа” хэмээж байсан ч цолыг нь батламжлаагүй. Гэсэн ч жил жилийн наадамд бөхөд хайртай түмний улсын цолонд хүрэх нь дамжиггүй хэмээн харж явдаг бөхчүүдийн нэг нь яах аргагүй Өвөрхангайн хүчтэн Т.Довчинсэмбээ гэгддэг байлаа. Тэр энэ жилийн Үндэсний их баяр наадамд улсын харцага Х.Гантулгаар тав давж начин цолны болзол хангалаа.