Ардын хувьсгалын 103 жилийн ойн үндэсний их баяр наадмын хурдан азарганы уралдаанд Булган аймгийн Гурванбулаг сумын харьяат С.Гал-Эрдэнийн нандин хонгор азарга түрүүлсэн билээ. Тэгвэл үүнтэй холбоотойгоор төрийн наадмын түрүү азарганы эзэн, Булган аймгийн Гурванбулаг сумын харьяат, “Богдын хурд” галын уяач С.Гал-Эрдэнэ манай сайтад баярын сэтгэгдлээ хуваалцлаа.

       Тэрбээр “Би монгол морины уяа сойлго, морин спортод чин үнэн сэтгэлээр дурлаж яваа нэгэн. Улсын их баяр наадамд адуун сүргийн манлай азарганы уралдаанд уясан азаргаа түрүүлгэнэ гэдэг үгээр хэлшгүй сайхан байдаг юм байна. Үнэхээр сайхан байна.

Нандин хонгор азарганы маань уяа, сойлго сайхан таарч, хурдан азарганы уралдаанд дундуур явж байгаад зугуухан урагшилж, үзүүр дээр дайрч түрүүллээ. Энэ амжилтад хүрэхэд том нөлөө үзүүлж байгаа хамгийн чухал хүн бол унаач хүүхэд шүү дээ. Хаана нь барих вэ, хаана татах, явуулах вэ гээд унаач хүүхдийн толгой компьютер шиг ажиллаж байж л хүрнэ.

Мөн энэ завшааныг ашиглаад Хөвсгөл аймгийн Тариалан сумын харьяат Ж.Эрдэнэсайхан, аймгийн алдарт уяач Д.Ариуннаран, нандин хонгорын маань анхны уяа сойлгыг нь тааруулсан уяач, туслахууддаа талархал илэрхийлмээр байна. Төрийн наадамд түрүүлсэн нандин хонгор маань над дээр соёолон байхдаа ирж байсан юм. Нандин хонгор “Хотгойдын хурд”-д түрүүлж, Төв аймгийн 100 жилийн ойн баяр наадамд аман хүзүүдсэн. Мөн Ардын хувьсгалын 100, 101, 102 жилийн ойн баяр наадамд уралдаж, 6-8 дугаар байрт орж байлаа. Харин энэ жил дутуугаа гүйцээж түрүүллээ дээ. Үнэхээр буянтай хүлэг юм л гэж бодож сууна.

       Соёолон байхдаа над дээр ирэхэд нь би нандин хонгор нэр өгсөн. Охины минь нэрийг Нандин гэдэг юм. Азарга маань аядуу, дөлгөөхөн болохоор охиныхоо нэрээр нандин хонгор гэсэн нэр өгсөн юм” гэв.