Жил бүр үндэсний их баяр наадмын найруулагч хэн байж, нээлтийн өдөр ямар үзүүлбэр, сэдвээр үзэгчдийг гайхшируулах нь хүн бүрд сонирхолтой байдаг. Хийсэн зүйлтэй, арвин туршлагатай сор бүтээлүүдийн эзэн болсон найруулагчид тухайн жилийнхээ наадмыг найруулж, өөрийн үзэл бодол, ур ухаанаа шингээдэг. Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадмын найруулагчаар Ц.Батнайрамдал ажиллаж байгаа билээ.

"Монгол туургатан" театрын найруулагч Ц.Батнайрамдалын түүхийг шинэ технологи, дэвшилтэт төхөөрөмжтэй хослуулах наадмын нээлтийн сэдэв, зохиол нь “Эх дэлхий, эх оршихуй цадиг” аж. Тэрбээр 

• 1988 онд дунд сургуулиа төгсөж, Төв аймгийн “Монгол туургатан” театрын жүжигчнээр ажлын гараагаа эхэлсэн.
• 1990 онд СУИС-ийн кино драмын анги төгссөн.
• Төв аймгийн театрт Ч.Лодойдамбын “Хугараагүй ноён нуруу” Л.Шийтэрийн “Туулсан зам” жүжгийг найруулсан
• 2008 оноос “Сити” их сургуульд багшилж эхэлсэн бөгөөд улмаар СУИС санал тавьсны дагуу найруулагч Н.Наранбаатартай хамтран хөгжимт театрын жүжигчний ангийг төгсгөсөн.
• 2014-2018 онд Хүй долоон худагт Соёлын наадмыг найруулсан.
• 2018 онд Монгол төрийн их баяр наадмын хүндэтгэлийн концертыг найруулсан.
• 2019 онд Монгол Улсын Ерөнхийлөгчийн ивээл дор зохиоон байгуулсан “Холливуд Монголд” төслийн ерөнхий найруулагчаар ажилласан.
• 2023 онд Төв аймгийн 100 жилийн ойн баяр наадмыг найруулсан юм.

     Ц.Батнайрамдалд аймаг, соёлын наадам найруулж байсан туршлага бий. Тэрбээр 2014-2018 он хүртэл дөрвөн жил дараалан Хүй долоон худагт Соёлын наадмыг найруулсан, 2019 онд Монгол Улсын Ерөнхийлөгчийн ивээл дор “Холливуд Монголд” төслийн ерөнхий найруулагчаар ажиллаж байжээ. Мөн “Legend” төслийн ерөнхий найруулагчаар ажиллаж байсан бөгөөд 2018 онд Монгол төрийн их баяр наадмын хүндэтгэлийн концертыг найруулж, 2023 онд Төв аймгийн түүхт 100 жилийн ойн баяр наадмын соёл урлагийн үйл ажиллагааны ерөнхий найруулагчаар ажилласан.

Улсын наадмын ерөнхий найруулагч Ц.Батнайрамдалтай холбогдож зарим зүйлийг тодрууллаа.

-Энэ жилийн үндэсний их баяр наадмын нээлтийн ёслолын онцлог нь юу вэ?

-Үндэсний язгуур өв соёлыг шингээсэн, мөн орчин үеийн хөгжмийн хөгжил дэвшлийг харуулсан энтертайнмент мюзикл болж байгаа нь энэ жилийн онцлог. Зохиолдоо тохируулан хөгжмүүдийг шинээр зохиосон, заримыг нь шинэчилсэн. Шинэ хувцас, шинэ тайз, хөгжмийг харуулахыг зорьсон.

-Наадмын бэлтгэл хэдэн хувьтай байгаа вэ. Баг бүрэлдэхүүнийхээ талаар яривал?

-Наадмын бэлтгэл 95 хувьтай байгаа. 1200 гаруй уран бүтээлч оролцож байна. 21 аймгаас өв тээгчид оролцож байгаа.

-Наадмын найруулагчаар сонгогдсон үеийнхээ сэтгэгдлээс хуваалцвал?       

-Найруулагч бүр өөрийнхөө үзэл бодлыг наадмынхаа нээлтэд шингээдэг байх. Миний хувьд үзэгчдэдээ шинэ цагийн үеийн урлагийн хөгжил дэвшил, бахархлыг харуулахыг зорьж байна.

-Үдшийн цэнгүүнийг хэрхэн хийхээр бэлдсэн бэ?

-Орчин цагийн этник, модерн дууг шинэчилсэн хэлбэрээр хүргэхээр бэлдэж байна. Мөн гэрэл, тайзны гайхалтай хоршлыг харуулахыг зорино.