УИХ-ын ес дэх удаагийн сонгууль өнөөдөр 07:00 цагаас албан ёсоор эхэлсэн. Баянзүрх дүүргийн 42 дугаар хорооны байранд санал өгсөн иргэнээс сонгуулийн саналын хуудастай холбоотой гомдол мэдээлэл манай редакцад ирсэн. Тодруулбал “Санал өгөх суудал хоорондын зай хэт ойрхон, саналын хуудас гэрэлтэж харагдахуйц нимгэн удаан хугацаагаар хүлээлгэхээс гадна хувийн мэдээллийн бүртгэж байна” гэх гомдол, мэдээлэл ирсэн. Үүнтэй холбоотойгоор манай сайтын сурвалжлах баг Баянзүрх дүүргийн 42 дугаар хорооны санал авах байрнаас мэдээллийн шууд дамжуулан үзүүлсэн.

       Энэ үеэр хэсгийн ахлагч “Манай хороонд 2604 сонгууль өгөх насны иргэн байгаа. Одоогийн байдлаар 430 орчим иргэн саналаа өгсөн, 16 хувийн ирцтэй байна. Саналын хуудсыг хавтаст хийж, санал өгөх бүхээгийн зайг байрныхаа хэмжээнд тохируулж байршуулсан. Манай хороонд өглөө Иргэний бүртгэлийн хурууны хээ унших төхөөрөмж хэсэг хугацаанд гацсан. Шуурхай албыг дуудаж хэвийн үйл ажиллагаанд оруулсан. Төхөөрөмж гацсантай холбоотойгоор иргэдэд хүлээлт үүсгэхгүйн тулд хуульд заасны дагуу иргэдийн регистрийн дугаарыг бүртгэж, гарын үсэг зуруулсан. Нэг иргэн хоёр саналын хуудас уншуулж байгаа учир цэвэрлэгээ давтамжтай хийж байгаа. Цэвэрлэгээ хийх хороонд иргэд 1-2 минут хүлээж байгаа” гэв.