Монгол Улсын Их хурлын ээлжит сонгууль орон даяар үргэлжилж байна. Энэ удаагийн сонгууль өнгөрсөн онд баталсан Үндсэн хуулийн нэмэлт, өөрчлөлтийн дагуу шинэ тогтолцоогоор зохион байгуулагдаж байгаа бөгөөд сонгогчид парламентын 126 гишүүнийг сонгоно. Тухайлбал, тэдний 78-ыг мажоритар буюу сонгогчдын саналаар, 48-ыг пропорциональ буюу жагсаалтаар сонгох юм.

                              Тэгвэл УИХ-ын 2024 оны ээлжит сонгуулиар гаднын 40 орон, 21 байгууллагын 259 ажиглагч СЕХ-д бүртгүүлэн сонгуулийн санал хураалтад ажиглагчаар ажиллаж байна. Гадаадын ажиглагчдын 191 нь Европын аюулгүй байдал хамтын ажиллагаа байгууллагын гишүүн орнуудынх бол үлдсэн 68 нь Монгол Улсад суугаа гадаадын дипломат төлөөлөгчийн газрын ажиглагч нар байгаа аж.

Мөн энэ удаагийн сонгуулийг гаднын “Kyodo News”, “CCTV”, “Bloomberg TV”, “Reuters”, “Xinhua”, “Nikkei”, “The Guardian”, “Agence-France-Presse” тэргүүтэй 12 байгууллагын 27 сэтгүүч сурвалжилж байгаа юм байна.